Aasaq ippeqinarniartoq
Nunatsinni ukioq aputeqangaatsiarsimavoq taamaammallu qeriunnaarnerup mamarsuani taseqangaatsiarpoq. Taamaammallu ippernanut illersuutit, seqqartaatit assigisaalu aasaq manna pisariaqartinneqassapput.
Uumassusilerinermut ippernanullu ilisimatooq, Darthmount Universitymeersoq, Lauren Culler qanittumi Kangerlussuarmiissimavoq.
- Ippernat eqisaavi amerlasuut nassaaraagut.
Qeriunnaartup masarsuata isugutattup ippernat eqisaavi pitsaanerpaaffissaaniitsippai.
- Sapaatit akunneri arlalialunnguit qaangiuppata amerlasoorpassuarnik takusaqarsinnaalereernissarput naatsorsuutigaarput.
Ippernarpassuaqarnera timmiaaqqanut aasiannullu nerisassaqarfiulluassaaq, tamannali eqqaassanngikkaanni ippernarpassuaqarnera sumut allamut iluaqutaasinnaanera Cullerip takujuminaatsippaa.
AAMMA ATUARUK Ippernaq nannuttoq
Cullerilli ippernaat pingortitami ataqatigiinnermut qanoq iluaqutissartaqarsinnaaneri ilisimatusarfigai. Assersuutigalugu:
- Timmiaaqqanut uumasuaqqanullu nerisassatut isumalluutitut qanoq pingaartigippat naasullu pujoralaasa siaruarternissaannut qanoq pingaaruteqartigippat.
Tamannami suli ilisimaneqanngilaq.
- Kalaallit Nunaanni ippernarpassuaqarnerani misigisassaq tataannaqaaq.
Akerlianilli ippernarpassuaqarnissaa marlunnik niulinnut nutaarsiassatsialaanngilaq.
- Inuit ippeqerrannissaat takornariallu ippeqingaatsiarnissaat naatsorsuutigaarput.
Paasissutissat piviusut
Ippernat kapisigaangamik enzymemik proteineqartumik aniasitsisarput. Inuillu assigiinngitsuugatta assigiinngitsumik qisuariartarpugut. Taamaattumillu ilaat kiggerlunnerusarput.
Ippernat arnavissat kisimik kapisisarput. Taamaaliortarpullu manniliorniarlutik. Arnavissat ullut 20-t missaannaannik uumasarput, aattoreersimatillutillu 200-t missaannik manniliorsinnaasarlutik.
AAMMA ATUARUK Qulimiguullit atorlugit ippernat akiornialerpaat
Aammattaaq sisamanik niulinnut tamanna ajunngitsuunngilaq. Ukioq ippernaqarfiungaatsiaraangat tuttut amerlassusaat ajoquserneqartarpoq.
- Ukioq manna ikinnerusunik tuttoqalissaaq amerlasuullu toqussapput.
Tuttullu ippernarpassuaqartup nalaani piaqqisinnaapput.
- Taamaammat ippernaqangaatsiarnera uippakajaassutigisinnaavaat.
Ukioq kingulleq upernaakkut kiammat qeriunnaartullu mamarsuanni tatsit panersimammata ippernaqarpallaanngilaq.
