Qulimiguullit atorlugit ippernat akiornialerpaat
Nunatsinniinnaanngitsoq inuit ippeqisartut nalunngilarput. Sverigemi aatsaat taama ippernaqartigisoq nalunaarutigineqarpoq, innuttaasullu oqartussanut maanna piumasarilerpaat ippernat qulimiguullit atorlugit akiorniarneqassasut, ippernat toqunartortalinnik akiorniarneqarnissaat piumasaqaataalluni. Aviisip Politikenip nittartagaani taama allattoqarpoq.
Allattoq Mads Lynge
juulip 23-at 2009 16:13
Österfärnebomi qaammaterpaalunni ippernaqangaarmat innuttaasut inigisaminnit anigumajunnaarput. Österfärnebop eqqaani nuna eqqissisimatitaammat oqartussat toqunartut atorlugit ippernaarsaanianngikkaluarput, maannali nakkaannartariaqalersimallutik.
Toqunartoq BTI-mik taaguutilik atorlugu nunangaatsiarujussuaq seqqitsarneqassaaq. Ukioq 2000-imi ippernaqarujussuallarmalli aatsaat ukioq manna aatsaat taama ippernaqartigaaq, ilami marloriaammik amerlatiginissaat eqqoriarneqarmat.
Österfärnebomi najugallit maanna neriuutigiinnassavaat ulluni tulliuttuni 14-ini siallissanngitsoq, taamaakkaangat ippernat amerleriartarput, maannalu akiuiniarneq qatangiinnartinneqaratarsinnaalluni.
