Aasanerani timersornermik atuartitsineq
Nalunneq, assammik isikkamillu arsarneq aasaanerani timersornermik atuartitsinissami timersuutit ilagissavaat. Taakkuli saniatigut aamma silaannarmiinnissaq inuiaqatigiinnilu sullisinissaq isiginiarneqarput.
- Pinngortitamut qanoq akisussaassuseqarnerput pillugu peqataasunut paasititsinissarput pingaartipparput. Ukioq kingulleq Kangerluarsunnguami saliivugut, ukiorlu manna Eqaluit paarlerni aserorteriviusimasumi iluarsaasissaagut. Neriuppungalu peqataasut taamaalillutik inuiaqatigiinni maligassiuilluarnertik ingerlateqqikkumaaraat. Sapaatip akunnerini marlunni meeqqat assigiinngitsorpassuarnik sammisassaqarumaarput, Kim Godtfredsen Atuarfimmi Timersornermiit taama oqaluttuarpoq.
Aasaanerani timersornermik atuartitsineq meeqqanut 1999-imi 2004-llu akornanni ingunngorsimasunut tamanut ammavoq. Atuartitsisussat arfinillit meeqqanut isumaginnittuussapput. Peqataaneq 300 koruninik akeqarpoq, peqataaniartullu 30. Juuli tikillugu nalunaarnissaminnut periarfissaqarput. Aasaanerani meeqqanut timersornermik atuartsinnissami annerpaamik meeqqanut 60-it inissaqarpoq.
- Ilinniartitsisussanik pissarsiniarneq ajornartorsiutigimanngilara, timersortartunimmi attaveqaqateqarluarpunga. Taakkulu ilinniartitsinissartik nuannarilluarpaat. Aasaaneranilu atuartitsinissarput atualernissaq sapaatip akunnerinik marlunnik sioqqullugu pisussanngortipparput angajoqqaat feriernerisa qaangiunneranni meeqqat sammisassaqartinniarlugit. Neriuutigaaralu aasaanerani kingumut timersornermik ilinniartitsinissarput iluatsilluarumaartoq, Kim Godtfredsen oqarpoq.
