Aasaanerani Atuarfimmi timersorneq aappaagumut allisarneqarniarpoq
Aasaanerani Atuarfimmi timersornermi meqqat 53-it peqataapput. Inissallu killeqarmata aaqqisuinit angajoqqaat arlaqartut meeqqaminnik peqataatitsiniaraluartut itigartittariaqarsimavaat. Meeqqalli aasaanerani atuarfimmi timersornermi peqataasut peqataanertik pissarsiaqarfigilluarpaat.
-Ukioq manna Eqaluit Paarlerni saliivugut. Puussiarsuit 25-it eqqagassanik immersimavagut, tamannalu meeqqanut peqataasunut eqiiallatitsivoq. Meeqqami peqataasut pinngortitami eqqagassanik igitsinnginnissaq ilikkagaqarfigaat. Qaqqamut pisuttuarnermik aamma misigisaqarput. Pilersaarutigisimagaluarparput qaqqat marluk majuarfigineqarnissaat, aappassaanillu majuarnitsinni affaanut killillutalu siallilerlunilu pujulermat tamanna unitsinnartariaqarsimavarput peqataasunut ulorianartorsiortitsinnginnissaq eqqarsaatigalugu, Kim Godtfredsen suliniummi ukiuni pingasuni tulleriinni aqutsisuusoq taama oqaluttuarpoq.
Nuummi taama aaqqissuussisarnerup iluatsilluartarneranit maanna Paamiuni Tasiilamilu ukiup tullianiit aaqqissuunneqartalersinnaasoq Kommuneqarfik Sermersuumit isumaliutaavoq. Aningaasartuutissallumi kommunimit isumagineqassapput.
-Taamatut aaqqissuussinissaq piffissamik sivisuumik pilersaarusiorfiussaaq, kommunelumi tamanna pillugu aasap tullianut suliniuteqalereerpoq. Aningaasallu nassaarineqassappata illoqarfinni taakkunani marlunni atuartitsisussat nassaariniarneqarumaarput. Sumiiffinnimi taakkunani marlunni pinngortitagissorsuuvoq, aqutsisunillu nassaarniarnissaq ajornarnerpaanaviarani. Aasaq manna maani Nuummi aasaanerani atuarfimmi timersorneq meeqqanit 50-it missaanittunik peqataaffigineqartoq sisamanik ilitsersuisoqarluta ingerlapparput, Kim Godtfredsen oqarpoq.
Aasaanerani Atuarfimmi timersorneq tallimanngorpat grillerinermik nuannisaqatigiilluni naggaserneqassaaq, tamannalu pitsinnagu peqataasut nalunnguariaqqaarumaarput.
