Aarsleff suliassanngortitseqqiisoqarneranit eqqugaaratarsinnaasoq

Pituffimmi kiffartuussinissamik isumaqatigiissutip assortuussutaasup Amerikami eqqartuussivimmut U.S Court of Federal Claimsimut suliassanngorteqqinneqarnera isumaqatigineqassagaluarpat, tamanna sanaartugassanik suliffeqarfiup Per Aarsleffip kiffartuussinissamik isumaqatigiissuteqarfigineqarsinnaaneranik akornusiisinnaavoq.

Danskimmi ingerlatseqatigiiffiat, Copenhagen Arctic, kiffartuussinissamik isumaqatigiissummut neqerooqataasoq, eqqartuussiviup Federal Court of Claimsip maajimi eqqartuussutaata inernera suliassanngorteqqinniarlugu aalajangersimavoq. Eqqartuussiviup aalajangiineratigut kiffartuussinissamik isumaqatigiissutip suliariumannittussarsiuunneqarnerani ajugaasup Exelis Servicesip tunineqarnera taamaatiinnarneqarpoq ingerlatseqatigiiffiup piginnittuata amerikamiuunera pissutigalugu.

Copenhagen Arcticillu eqqartuussivimmit maanna erseqqissartikkusuppaa suliffeqarfinnik ingerlatsisunut sullissisunik nunanit allaneersunik atuisoqarsinnaanersoq imaluunniit atuisoqaqqusaannginnersoq. Ingerlatseqatigiiffiullu neqerooruteqarnini pissutigalugu taamaaliunngilaq, "pilersaarusiornermulli tunngatillugu" tamanna erseqqissaateqarfigineqarnissaa pisariaqartinneqartoq, ingerlatseqatigiiffiup pisortaanera, Jeppe Handwerk, taama ilisimatitsivoq.

AAMMA ATUARUK Pituffiup aalajangiiffigineqarnera suliffeqarfiup allap aamma suliassanngorteqqippaa

AAMMA ATUARUK Aarsleff: Kiffartuussinissamik isumaqatigiissut uagutsinnut tunniunneqartariaqarpoq

Suliffeqarfinnik nunanit allanersuunik atuinissaq tunuartinngilaa
Tamannalu Per Aarsleff A/S-imut kinguneqarsinnaavoq. Suliffeqarfik taanna neqeroortitsinermi akikinnerit aapparaat taamaattumillu kiffartuussinissamik isumaqatigiissut suliffeqarfimmut tassunga tunniunneqartariaqaraluarpoq, pisortaaneq Ebbe Malte Iversen taama oqarpoq.

Pisortaanerup Ebbe Malte Iversenip Pituffimmi kiffartuussinissamik isumaqatigiissummut neqerooruteqarnermi ingerlatseqatigiiffiup suliffeqarfinnik ingerlatsisunut sullissisunik nunanit allaneersunik atuisinnaanera tunuartivissunngilaa, KNR-imulli ima oqarluni:

- Kikkunnik sullinneqassanerluta aammalu atortussat sulisussallu suminngaanneernersut oqaatigerusuppallaanngilarput. Niuernernikkut isertuuttariaqakkatut isigaarput. 

Pituffimmi sakkutooqarfimmi kiffartuussinissamik isumaqatigiissummi suliffeqarfinnik ingerlatsisunut sullissisunik atuinissaq inerteqqutaalissagaluarpat tamanna Per Aarsleff A/S-imut qanoq kinguneqassanersoq apeqqutigineqarmat Ebbe Malte Iversen ima akivoq:

- Tamanna iluamik akisinnaanngilara, imalu nangippoq:

- Isumaqatigiissummi aalajangersakkat maleqqissaarpagut. Allatut paasineqarsinnaanerinik paasinnittoqarsimagunarpoq suliassanngortitseqqiisoqarlunilu. Suliariumannittussarsiuussinermi nutaami tunaartarineqartussat allanngortinneqassappata soorunami aamma taakku malikkumaarpagut.

Ingerlatseqatigiiffilli isumaqatigiissuteqarfigineqassagaluarpat kalaallit danskillu sakkutooqarfimmi sulisuusut 80 procentiisa missaat Per Aarleff A/S-imut nuutsinneqassasut neriorsuutigaa, taakkulu akissaatitigut isumaqatigiissutit atuuttut naapertorlugit atorfeqartinneqassapput.

Copenhagen Arctic A/S-illu suliassanngortitseqqiinera pillugu Ebbe Malte Iversen ima oqarpoq:

- Tassa niuernermi atugassarititaasut taamaapput.