Aarrit Qaanaami akorngusersuisut

Tamanna Namminersorlutik Oqartussat, ICC aamma Pinngortitaq pillugu nunarsuaq tamakkerlugu suliniaqatigiiffik , WWF, Qaanaami innuttaasunik isumasiuilluni ippassaq ataatsimiisitsimmat erserpoq.
 
- Saqqummiunneqartut soqutiginartut ilagaat aarrinut tunngasut. Piniartummi arlallit oqaluttuarput aarrit kangerlunni pulavarternerusalersimasut. Pulavartileraangatalu puisit kangerlunnit aamma tammakartartut. Taamaattumik piniartut arlallit oqaluttuarput siornatigumut sanilliullugu puisit pisarisartakkatik ullumikkut ikileriarsimasut, Pinngortitaq pillugu nunarsuaq tamakkerlugu suliniaqatigiiffimmeersoq, Mette Frost, oqarpoq.
 
Taamaattumik aarrit Qaanaami nunaqarfiinilu piniartunut ulorianartorsiortitsisut Qaanaami piniartut sinniisaat isumaqarpoq:
 
- Tassa ima akornutaatigipput ukiakkut maanga Qaanaap qanitaaniippallaaleraangamik imaluunniit Siorapaluup qanitaaniippallaaraangamik sikuneratigut puiseqanngitsoortittarpaat. Tassa taama akornutaatigipput, Qaanaami aalisartut piniartullu peqatigiiffianni siulittaasoq, Mads Ole Kristiansen, oqarpoq.
 
Qaanaami nunaqarfiinilu piniartut ullumikkut 80-it missaaniipput. Taakkua ukiumut 64-nik aaffattassinneqartarput, naak aarrit siornatigut killilersugaanngikkallarmata piniartut ukiut 300-it tungaanut aaffattarsimagaluartut:
 
- Siornatigut killilersuisoqanngikkallarmat piniarfipput taanna nakkutigineqarluni paarilluarneqarnikuuvoq aarrinik pulaffigittaalillugu. Tassa imaappoq aarrit amerliartuinnarnerisa kingunerisaanik ataqatigiinngitsumik pisoqalerneranit ulorianartorsiortinneqariartuaarpugut, Mads Ole Kristiansen oqarpoq nangillunilu:
 
- Iluarpoq taamatut toqqaannartigisumik aperineqarluni uagut atukkagut tusarusunneqarlutik, taavalu ilisimatinneqarluta allakkiarineqassasut paasissutissatullu atorneqarumaartut,
Mads Ole Kristiansen oqarpoq.
 
Innuttaasunik isumasiuilluni ataatsimiisitsinermi 18-it tungaanut peqataapput:
 
- Piniartut pineqartut pinngortitamik sikumillu atuisuupput. Taakkualu allannguutinik sakkortunerpaamik maluginnittuupput. Taakkualu misilittagaasa tusarfiginerat pingaarnerpaajuvoq. Soorlu sikup sinaata qaninnerulersimanera aammalu uumasut ingerlaartarfiisa allanngorsimanerat. Aamma aarrit eqqartungaatsiarpagut. Aarrit qanoq ingerlaarfeqarnersut. Aamma piniarfiit ilaasa silaannaap kissatsikkiartornera pissutigalugu qanoq allanngorsimanerat. Tamakkua piniartut maluginiarsimavaat pingaaruteqarput ippassarlu tusarfigineri soqutiginarlutik, Mette Frost oqarpoq nangillunilu:
 
- Nuummut Københavnimullu angerlakaasussanngorpugut. Tusakkagullu eqqarsaatigilluassavagut allaaseralugillu. Suliniaqatigiiffitsinnilu tamatta immikkut nalilersussuagut suliniarnitsinni paasisagut qanoq atussanerlutigit.