Aaqqissuusseqqinnermut aningaasat suli amigaataapput
Naak aningaasat suli amigaataagaluartut, Ilinniarnertuunngorniarfiit aaqqissuuteqqinnerat, ilinniartut aappaagumiit malugisinnaaleriissavaat.
Ilinniartut qilanaarissinnaavaat, fagit nutaat ilinniartitaanerlu pitsaanerusoq, tassani pineqarnerullutik oqaatsinik atuineq ilinniartitaanerullu imarisassaat allat. Taamaaliornikkut ilinniartut qaffasinnerusumik ilinnialernissamut piukkunnarnerulernissaat neriuutigineqarpoq.
Kisianneqarporli. Aaqqissuusseqqinerup inerneri tamakkiisut Ilinniartitaanermut Naalakkersuisup, Palle Christiansenip allaffiani atuutsinneqalernissaminnut utaqqiinnarput, aningaasalli tamakkiisut suli nassaarineqanngillat.
Aaqqissuusseqqinnerup aallartisarneqarnera 20 millioni koruuninik ukioq siulleq akeqasaaq, ukiuni tulliuttuni 40 million koruunit ukiumut atorneqartassallutik.
- Aningaasanut Inatsit pillugu isumaqatigiinniartunit oqarfigineqarpunga, aaqqissuusseqqinneq Ilinniartitaanermut Naalakkersuisoqarfimmut aningaasaliissutinit nammineq aningaasalersortariaqaripput. Uaugullu oqarpugut, uagutsinnut 2012-mi aningaasaliissutini 12 millioni koruunit nassaarisinnaallugit, taamaammallu pingaarnersiuisariaqartugut. Tassalu ilinniarunaartartut ikilisarniarlugit ilinniartut inaanni isumaginninnikkut iliuusissatut pilersaarutit aaqqissuusseqqinerup aallateqqaarnerani ilaassanngillat, Palle Christiansen oqarpoq.
Kisianni aappaagumut Aningaasanut Inatsissami aningaasanik amerlanernik nassaarnissani, ilinniartitaanermut naalakkersuisup suli neriuutigaa. Palle Christiansenip Inatsisartunut ippassaq saqqummiinermini partiit tamaasa inappai, Ilinniarnertuunngorniarfiit pitsaasumik aallartinneqassappata, aningaasanik nassaarniarnermi isumassarsianik pitsaasunik partiit ujarleqqullugit.
- Ilinniartitaanermut aningaasanik amerlanerusunik aallerfissarput uagut nassaarereerparput, sulili isumaqatigiinniartoqartillugu Ilinniartitaanermut Naalakkersuisoqarfiup Aningaasaqarnermullu Naalakkersuisoqarfiup kisimik tamanna ilisimagallassavaat, Ilinniartitaanermut Naalakkersuisoq, Palle Christiansen oqarpoq.
