Aaqqissuisuuneq naleqarluassaaq
- Annertoorujussuarmik sunniuteqarsinnaavoq, sutigut tamatigut. Qanorluunniit assortuitigigaluarutta pinngitsoorani namminermi sunniuteqassaaq.
Kommuneqarfik Sermersuup Namminersorlutillu Oqartussat Arctic Winter Gamesimik aaqqissuisuujumallutik Arctic Winter Gamesip nunani tamalaani kommitéanut qinnuteqareerneranni Kim Godtfredsen taama oqaaseqarpoq.
Aaqqissuisuunissamut qinnuteqaammi kissaatigineqarpoq sukuutsinik unammiuaarnerit Nunavummi Iqalunni ingerlanneqassasut.
Kim Godtfredsenip oqarneratut, Nunatta 2002-mi aaqqissuisuunera inuusuttut meeqqallu timersornermut soqutiginnilernerannut annertuumik sunniuteqarsimavoq.
- Arctic Winter Games 2002-mi maaniimmat malunnarpoq, sunniuteqartupilussuusoq. Timersoriakaasorpassuaqartalerpoq assigiinngitsunik. Timersornermut tunngasunik piumassutsimik sulerusunneq annertusivoq, Kim Godtfredsen oqarpoq.
Naak 2016-imi aaqqissuisuunissaq suli aalajangerneqanngikkaluartoq, Kim Godtfredsenip meeqqat inuusuttuaqqallu ukiut sisamat qaangiuppata Nunarput sinnerlugu peqataasussat neriulluarfigai.
- Massakkut 3-5 klassini atuartut akornanniittoqassaaq timersorneq ajortunik pikkorissupilussuarnik, taakkualu periarfissinneqartuugunik aammalu kaammattorneqartuugunik pinngitsooratik ilaqassapput angusarissaarsinnaasunik, Kim Godtfredsen oqarpoq.
Aaqqissuinissamullu qinnuteqartut naatsorsuutigaat inuit peqataasussat 2.000-it missiliussagaat, aningaasartuutissallu 48 millionit koruunit missaaniissangatinneqarput.
