Aaqqissuisartoq pissanganarsaarisartorlu aallartippoq
Danmarkimi isiginnaartitsinerup silarsuaa, Aarhus Festuge Nuummilu Katuami pisartut assigiinngitsut aqqusaartareerlugit Susanne Andreasen namminersortutut aallartinnissaminut piareersorivoq. Isiginnaartitsinermut ilinniarfik ilanngullugu Nunatsinni suliffeqarfik nutaaq aallartittussanngorpoq.
- Sivisuumik eqqarsaatigisimavara misigisimallungalu maanna aallartittariaqarlunga. Nalunngilara suliassaqartoq aammali tammakarsinnaasarput iluamik nakkutigineqanngikkaangamik. Aallartinniakkat ilaatigut inaarnissaat amigaataaginnartarpoq isumaqarpungalu tassani ikiuussinnaallunga. Imaassinnaavoq atuarfiit ilaat isiginnaartitsinermik aaqqissuerusuttoq imaluunniit suliffeqarfiit ilaat alutornartumik iliuuseqarusuttoq. Misilittakkakka tunngavigalugit tassani iliuuseqarsinnaasoraanga, suliffeqarfimmik 'Eventværket og Dramadronningen'-mik piginnittoq Susanne Andreasen oqarpoq.
'Eventværket og Dramadronningen' suliffeqarfimmiut atsiutissallugu immaqa eqqumiissinnaavoq. Taamaattoq taamatut atsiinermi eqqarsaatit assigiinngitsut tunulequtaapput. Tassami assigiinngitsorpassuarnik naammassisaqarsinnaasutut misigisimavoq
- Isiginnaartitsineq pisunillu aaqqissuussinissat misilittagaqartuunissamik pisariaqartitsipput tamannalu Kalaallit Nunaanni najugalinnit naammassineqarsinnaavoq. Annertuunik pisoqassatillugu maannamut Danmarkimut ikiortissarsiortoqartarpoq. Maanna maani najugalimmut attaveqartoqarsinnaalerpoq, Susanne Andreasen KNR.gl-mut oqarpoq.
Eventværket og Dramadronningen uani atuarsinnaavat: http://www.eventvaerket.dk/114407905
