Aappariit Jyllandimi ujajaaniartarsimasut eqqartuunneqalerput
Angut 30-nik ukiulik Libanonimiu arnaataalu kalaaleq 26-nik ukiulik Aalborgip eqqartuussiviani ippassaq sassartinneqarput. Aappariit taakku Fynimi Jyllandimilu arlalippassuariarlutik ujajaaniartarsimasutut unnerluutigineqarput.
Allattoq Louise M. Kleemann
Aviisimi Nordjyskimi allaaserisami oqaatigineqarpoq, aappariit taakkua inatsisinik 27-riarlutik unioqqutitsisimasutut unnerluutigineqartut.
Aappariit 2009-mi januaarip qulingiluaanni ujajaaniartarnertik aallartippaat. Qaammatit marluk qaangiummata aappariit biili qimaanerminni atugaat politiinit aporneqarluni unitsinneqarmat, aappariit tigusarineqarput.
Aappariit unnerluutigineqarnerminnut tamanut pisuunnginnerarput. Eqqartuussinerup ingerlanerani inuit 60-it missaat ilisimannittutut apersorneqassapput, eqqartuussinerlu aatsaat apriilip naanerani naammassineqassangatinneqarluni.