Aappariit anorimit kaamisarneqarlutik Qaanaaliarniarput

Anoreqarluarnissaanik neriunnerannut pissutaavoq, misigisassarsiorumatuut taakku sisoraatitik atorpallaarnagit, aarsaartaammit kalinneqarlutik ingerlasinnaanissartik neriuutigimmassuk.

- Anorlilernissaa ullut arlallit tupermiilluta immaqa utaqqisassavarput, Heidi Clover illoqarfiup aviisianut, This Is South Devon-imut, oqarpoq.

Suli ungasinnerusumut angalanissartik uinilu pilersaarutigisimagaluarpaat, meeqqatilli pingasut, suli nukangasut, taama sivisutigisumik paarsisussaqartinnginnamikkik, Ilulissaniit Qaanaap tungaanut kilometerit 1.400-t taakku sapaatip-akunnerisa sisamat ingerlaneranni naammassiniarniarlugit isumaqatigiissutigiinnarpaat. Anguniagartik anguniarunikku nuliariit taakku ullormut kilometerit 40-t missaanni ingerlaartariaqartassapput.

Tuluit taakku marluk aasarli sakkortuumik sungiusalerput, inunnulli aningaasaateqarluartunut suliffeqarfinnullu ingerlalluartunut aningaasaliisussarsiorlutik piffissaq aamma atorsimavaat, neriorsorneqartarsimappullumi. Robert aamma Heidi Cloverip neriuutigaat angalanissaminnut minnerpaamik 400.000 koruuninik pissarsisinnaassallutik.

Avatangiisit pillugit suliaqatigiiffiup, Earthwatch-ip, aamma autismeqartut pillugit paasititsiniaasartup, Make Wawes for Autism-ip, aningaasat tuluit aappariit pissarsiaat avissavaat.

- Inunnik suliffeqarfinnillu aningaasaliisussarsioratta suliniutinut pitsaasunut atorniarlugit allatut ajornartumik nassuiaattariaqartarsimavavut, Heidi Clover oqarpoq.

Tassalu aarsaartaat atornerullugu Ilulissaniit Qaanaap tungaanut angalanissaq toqqarpaat.