Aanngajaarniutinik atuisoqarnersoq naalakkersuisut misissortariaqarsorinngilaat
Qinikkat aamma Naalakkersuisut ikiaroornartumik hashimik atuisartutut politiinit pasineqarpata, taakku aatsaat aaversissapput quuiluunniit misissorneqarlutik. Taamaattumik politikerit tallimikkut kapineqartariaqanngillat quuminnillu misissugassamik tunniussisariaqaratik. Naalakkersuisut taama isumaqarput.
Qinikkat qinigassanngortissinnaanerannut inatsiseqareerpoq, taakkulu atuupput. Aamma aanngajaarniutit pillugit inatsimmik unioqqutitsinerit politiit eqqartuussiviillu akisussaaffigaat.
- Taamaammat innuttaasut ilaasa inatsisitigut illersugaanerminnik arsaagaanissaannik isuma isumaqatigisinnaanngilarput, Naalakkersuisut siulittaasuat, Kuupik Kleist, Doris Jakobsenimut akissuteqaammini allappoq.
Aanngajaarniutinik atuineq pillugu oqalinneq upernaaq qineqqusaartoqarnerani aallartippoq, taamanimiillu Doris Jakobsenip malersuinera aallartippoq. Nunarsuatsinni inatsisartut allat aanngajaarniutinik atuisuunersut misissuivigineqarneq ajorput.
