Aanaakkunni juulli nipitittagagaliornermini isumassarsiorfigisimagaa
- Julemærkimut nassiussisussanngorlunga qalipaasussanngorlunga siulleq eqqarsaatiginikuuara juulli eqqarsaatigissagukku eqqaasassara suna siulliua? Taava eqqaasara siulleq aanaakkut juulliat. Nammineerlunga meeraallunga pingaartutut isiginikuugakku aanaakkut juulliat, suli massakkumut soorunami, Paneeraq Grønvold oqarpoq.
- Sanaara isigissagutsigu kissalaartoq taanna siulliunnikuaara. Taavalu aanaakkut juulliat soorlu pequtai qangarpalaartut akisoorsuunngitsut taavalu aanaakkut meeqqallu imminnut ataqatigiippasissut, Paneeraq Grønvold oqarpoq.
AAMMA ATUARUK Ung kunstner bag årets julemærke
Juullip nipitittagaanik ukiut 46-ssaannik saqqummiussisoqarpoq. Eqqumiitsuliortullu 20-t- 25-llu missaanniittut ukioq manna nassiussisimapput.
- Paneeqqap suliaa toqqarparput peqqutigalugu juullerpalaartuummat aamma kissalaartuulluni soorlu ilaqutariit kinguaariit akimorlugit ataqatigiinnerat ersilluni. Taavalu aamma orpiliaarannguaq tunuani takuneqarsinnaasoq, orpiliaalluni tamakkua kakillarnat atorlugit orpilialiortarallarmata orpiliaarannguaq, juullip nipitittagaata aningaasaateqarfiata siulittaasua Helena Jensen oqarpoq.
Juullip nipitittagaanik 1974-imi kalaallit kulturiat iluaquserniarlugu saqqummersitsisoqartalerpoq. Aningaasaateqarfiullu isertitai kalaallit kulturikkut suliniutaannut eqqumiitsuliaannullu ilaatigut atorneqartarput.
AAMMA ATUARUK Ukioq manna juullip nipitittagaa aajuna
- Soorlu socialinut tunngasuusuuppat inuiaqatigiinni ajornartorsiutit allallu tamakkua taperneqarluartartorujussuupput. Kisianni kulturimut tunngasut imatorsuaq taperneqarneq ajorput, taamaattumik pingaartittorujussuuarput ingerlaannarnissarput aamma juullip nipitittagaata pisiariuarneqarnissaa, Helena Jensen oqarpoq.
Tassami juulli immikkuullarissuuvoq pingaarutilik:
- Uannut juulli isumaqartorujussuuvoq ilaqutariittut ataatsimoorfigisaratsigu, nammineerlunga ilaqutariippassuit akornaninngaanneerama, taava asanninnermik nassataqartorujussuuvoq, Paneeraq Grønvold oqarpoq.
Helena Jensenilu isumaqataavoq.
- Isumaqartuaannarpoq ilaqutariittut katersuuttarfigigatsigu aamma ilaquttat immaqa takunngilaarsimasat ornillugit imaluunniit aggerlutik, silatangiaasoqarluni, Helene Jensen oqarpoq.
Juullip nipitittagaa nittartakkakkut juulli.gl-ikkut aamma pisiarineqarsinnaavoq.
