Aallarnisaasut peqatigiiffiannik nutaamik pilersitsisoqartoq
Aallarnisaasartut peqatigiiffiat Sakkut marsimi pilersinneqarpoq. Pele Broberg, JJ Lennert Sandgreen aamma Jens Andersen pilersitsisoralugit.
- Politikkerit aalajangiisartullu Nunatsinni aallarnisaasarneq pillugu ilisimaqarnerulersinnissaannik siunertaqarluta peqatigiiffik sakkut pilersipparput, peqatigiiffittaami Sakkuni siulittaasoq Pele Broberg tusagassiuutinut allappoq.
- Aallarnisaasarnerup pitsanngorsarneqarnissaa politikkikkut sammineqarneranni siunissami aallarnisaasartut sinaakkutissaat pillugit oqalliseqataasinnaanissarput neriuutigaarput, Broberg nangilluni allappoq.
Peqatigiiffimmik pilersitsisut ilaasortallu aallarnisaanermik misilittagaqarput, ilisimallugulu suliffeqarfimmik pilersitsiniarneq aallarnisaaniarnerlu qanoq ajornartigisinnaasoq.
- Aallarnisaasartut iluatsilluarnerusalissappata sinaakkutit atugassarititaasut pitsaasut amigaataapput, naak aalarnisaasartut amerliartornissaat kissaatigineqaraluartoq. Taamaammat siunissami aallarnisaasarnissaq pillugu oqallinnissamut Sakkut kaammattuipput, Pele Broberg allappoq.
Sakkut aallarnisaanermi atugassarititaasunik pitsanngorsaanermi makku ilaatigut sammerusuppaat:
- Aningaasanik atorniarsinnaaneq, aningaasaliisinnaasunik pissarsisinnaanissaq
- Namminersorlutik Oqartussat pigisaanniit unammillerneqannginnissaq
- Siunnersorneqarnissamut tapiiffigineqarneq nunatsinnut tulluussagaq
- Inatsisitigut sinaakkutit ullutsinnut tulluussarnerat, soorlu aningaasatigut piumasaqaatit digitalisering atorlugu pisariunnginnerusumik sakkussaqalerneq.
