Aallakaatitat siaruarterneqartarnerat nutarneqaleruttorpoq
Aasap ukiallu ingerlanerani digital atorlugu aallakaatitanik siaruarterineq sinerissami illoqarfinni amerlanerni atorneqalissaaq, kujataani Nanortalimmit avannamut Uummannaq tikillugu.
Kalaallit Nunaanni tamarmi TV-kkut isiginnaartartut radiukkullu tusarnaartartut oktobarimi ukiut marluk qaangiuppata, 2012-imi digital atorlugu aallakaatitanik tusarnaarlutillu isiginnaarsinnaalissapput, Kultureqarnermut Naalakkersuisoq Mimi Karlsen Inatsisartunut ilaasortamut Isak Hammondimut IA-meersumut akissuteqarluni taamatut oqarpoq.
Digital atorlugu aallakaatitanik siaruarterisoqalerpat, KNR-TV-kkut isiginnaarneqarsinnaasut saniatigut TV-qarfiit nunanit allaneersut pingasut aallakaatitaat nuna tamakkerlugu akeqanngitsumik isiginnaarneqarsinnaalissapput.
TV-kkut aallakaatitsiffik ataaseq immikkut ittumik pisoqartillugu aallakaatitsinerni atorneqartassaaq soorlu inatsisartut ataatsimiinnerat imaluunniit nuna tamakkerlugu immikkut ittumik pisoqartillugu toqqaannartumik aallakaatitsisoqaraangat.
TV-kkut aallakaatitsisartussat pingasut nunanit allaneersut sorliunissaat, Namminersorlutik Oqartussat aalajangertussaavaat. TV-qarfiit nunanit allaneersut pingasut neqeroorutaat KNR-imit utaqqineqarput, taakkualu neqeroorutaat Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisoqarfimmut ingerlateqqinneqassapput aalajangiiffigisassanngortinneqarlutik.
Digital atorlugu aallakaatitat siaruartinneqalerpata, TV-qarfiit nunanit allaneersuut sorliit aallakaatitsisalernissaannut siunnersuutit KNR-ip pisortaanit Ivalo Egede-mit oqaatigineqarusunngikkallarpoq.
Taassumali qulakkeerlugu oqaatigisinnaanerarpaa, meeqqanut TV-kkut aallakaatitanik piukkunnarluartunik KNR ujartuimmat.
Digital atorlugu aallakaatitanik siaruarterineq atorneqalerpat, KNR-TV-kkut aallakaatinneqartut erseqqarinnerulernissaat Ivalo Egede-mit qilanaarineqarpoq.
