Aallaasit umiatsianut qimaannaqqusaanngillat
Maleruaqqusamik unioqqutitsisoq aallaasiminik arsaarneqarsinnaavoq akiligassinneqarlunilu. Maniitsumi politiit juunip 9-ani nalunaarfigineqarput umiatsiaaqqami aallaat imalik siumorneqarsimasoq. Politillu aallaat pineqartoq takusaramikku naammattoorpaat imaqartoq immersartualu aamma imaqarluni. Tamannalu ineqquttaalluinnarpoq malerugassanut unioqqutitsinerulluinnarluni.
- Sisimiuni politiit juunip 12-anni nalunaarfigineqarput meeqqat angallataatillit puttasuisa eqqaanni gummibådertut. Meeqqat naammattoorneqartut kingorna angerlaanneqarput.
Misissuisoqarmat paasinarsivoq meeqqat angallammi nuannaariummi timmiarsiummik aallammillu nassaarsimasut. Aallasillu seqqortaarutigisimavaat. Qujanartumilli meeqqat ajoqusersimanngitsut, Johan Davidsen oqaluttuarpoq.
Politiit innutaasunut sakkortunerpaamik kajumissaaripput aallaasitik sumut tamaanngaannaq ilisassaanngikkaat. Aallaasit eqqunngitsumik atorneqarunik ulorianarluinnartumik kinguneqartumik pisoqarsinnaammat.
Taamaattummik aallaasinik sumut tamaanngaannaq angallatini angerlarsimaffinnilu ilisisoqartassanngilaq, ingammik imaqartillugit imassanillu aamma maanngaannaq ilisisoqartassanani.
