Aalisartut saarullittassiissutit unammissutigineqarnerulernerat ernummatigigaat: Umiarsuit amerlavallaareerput
Amerlanerusut tunup avataata imartaani saarullinniarsinnaatitaassapput.
Naalakkersuisut tunumi saarullinniarnermi umiarsuaatileqatigiiffimmut nutaamut umiarsuaatileqatigiillu kilisattut arfinilissaannut ammaassiniarlutik aalajangersimasut taama isumaqarput.
Taamaammat 2023-mi saarullittassiissutit suliffeqarfinnit nutaanit marlunnit piumaneqalereersut 7.500 tonsit inniminnerneqartut, Sermitsiaq.AG allappoq.
Unammillernerli annertusineqassappat umiarsuaatileqatigiiffinnut pioreersunut aningaasatigut kingunerluuteqangaatsiassaaq. Pisassiissutimmi annikereerput, taakkumi ukiup naannginnerani nungoreerneqartarput, taamaammallu qaammatini arlalinni aasarsinnaasanngillat.
Sigguk A/S-imi pisortat piginneqataasorlu Frans Heilmann KNR-imut oqarpoq.
- Kilisaatit tamarmik maanna qaammatinit pingasunit sisamanut ukiumut uninngasarput, taanna oqarpoq.
Pisassiissutinnguit arlallit agguaattaraat
Umiarsuaatileqatigiiffiit katillugit tallimaasut tassa – Arctic Prime Fisheries ApS, Royal Greenland A/S, Sigguk A/S, Polar Seafood A/S aamma Qaleralik A/S – tunumi ukiuni kingullerni saarullittassiissuteqarfiupput.
Naalakkersuisut saarullittassiissutit 5.000 tonsimik annertusineqarnissaat siorna decembarimi aalajangerpaat, tunumi 2023-mi pisassiissutit taamaalillutik 27.000 tonsiulerlutik.
Amerlanerusunut agguaasalernissaq Arctic Prime Fisheriesimut saarullittassiissutitigut kingunerluutaassaaq, tassami 2.000 tonsimik annikillineqassammat.
2023-mut saarullittassiissutit agguataarnerat:
- Arctic Prime Fisheries ApS: 8.481 tonsit
- Sigguk A/S: 3.362 tonsit
- Qaleralik A/S: 2.066 tonsit
- Royal Greenland A/S: 4.172 tonsit
- Polar Seafood Greenland A/S: 1.549 tonsit
- Ingerlatsisuusinnaasumut nutaamut sillimmatit: 7.515 tonsit
Katillugit: 27.145 tonsit
Paasissutissarsiffik: Aalisarnermut piniarnermut Naalakkersuisoqarfik.
Ingerlatseqatigiiffiit sinnerisa sisamat pisassiissutit pigeriikkatik tigummiinnassavaat, allamulli aamma pisassiissuteqartoqarnera taakkununnga aamma ajornartorsiutaassaaq.
AAMMA ATUARUK Naalakkersuisuts oplæg til hellefiskekvote deler vandene
Amerlavallaammi aalisakkanik ikippallaanik aalisarnerat umiarsuaatileqatigiiffiit tamarmik aningaasanik annaasaqarfigissagaat, Frans Heilmann isumaqarpoq:
- TAC (pisarineqarsinnaasutut akuerisat annertussusaat) maannakkut atuuttoq Naalakkersuisunit aalajangerneqarsimasoq amerlanerusunut pisassiissuteqarnissamut naammanngilaq, taanna KNR-imut oqarpoq.
Nutaat ilisimaneqareersuusut
Saarullittassiissutit 7.500 tonsiusut qinnuteqarsimasunut tassa Tuukkaq Trawlimut imaluunniit Norsamut tunniunneqarsinnaapput.
Tuukkaq Trawl A/S Carl Steffen Christensenimit aamma Robert Møllerimit pigineqarpoq. Carl Steffen Christensen nunatsinni aalisakkerinermik suliffeqarfinnik allanik arlalinnik piginneqataareerpoq, taannalu Qaleralik A/S-imik tunumi saarullinniartartumut 25 procentimik piginneqataalluni.
Carl Christensenip oqarnera naapertorlugu saarullinniarsinnaatitsinissamut suli inissaqarpoq. Taassuma tamanna Sermitsiaq.AG-mut oqaatigaa.
- Aalisarnermi nutaamut pisassiissuteqartoqarnissaa ajunngilaq. Pisassiissuteqarfigineqartartutoqqat siullertut pisassiissuteqarfigineqarnissaat ilumoorsinnaanngilaq, taanna oqarpoq.
Norsaq ApS siammasissumik piginneqataaffigineqarpoq, Kim Høegh-Dam nunatsinni alisarnermi inuussutissarsiuteqarnermi ilisimaneqareersumit ilaatigut piginneqataavoq.
Suliffeqarfinnit taakkunannga marlunnit sorleq pisassiissuteqarfigineqassanersoq, Naalakkersuisut marsip 31-ani aalajangissavaat.
KNR-ip Royal Greenland aalisarfimmi nutaamut pisassiissuteqartoqarniarnera qanoq igineraat pillugu oqaaseqartinniarsarigaluarpaa. Taakkuli oqaaseqarumanngillat.
