Aalisartut piniartullu ulluata malunnartinneqarnerani puisip neqaanik pølsilianik ooqattaagassaqartitsisoqartoq
Aalisartut piniartullu 40-t missaat ullup qeqqata missaani najuupput. Annoraaqarrallutillu sulliseqarrallutik issiapput, Nuummilu Aalisartut Piniartullu Peqatigiiffiata, NAPP-ip, aaqqissuussaani susoqarnissaa pissanngatigaat.
NAPP New Arctic Kitchen suleqatigalugu puisip neqaanik pølsiliat atorlugit hotdogilianik ooqattaagassaqartitsivoq. Ooqattaagassaq taanna igasup Inunnguaq Hegelundip nerisassiorluni misileraanermini isumassarsiaaraa. Ullumikkullu ooqattaarneqarsinnaavoq.
Puisip neqaanik pølsiliaq puisip neqaanik ilitsoqqussaqanngitsunut - soorlu takornarianut - naleqqussarlugu akuugaavoq. Assi: Malik Brøns
Aalisartut piniartullu hotdoggi ooqattaareermassuk 1-imiit 10-mut pointiliinermikkut nalileeqquneqarput.
Puisip neqaanik pølsiliamik ooqattaagassaqartitsineq
Aalisartut piniartullu 40 missaanniittut hotdoggimik ooqattaagassaminnik nerriviusamut sassaallerneqarsimasunik aalleriarlutik pissangallutik issaajartoqqipput. Nerrillutillu aallartipput.
Inunnguaq Hegelund pusip neqaanik pølseliamik misiliititsivoq. Assi: Malik Brøns
Nerriviit akornanni nipaappoq, nerrittoqarporli.
- Mmmh, mamaq, nerriviit ilaannit oqartoqarpoq.
Puisip neqaanik pølseliaq ataatsimit akuerineqareerpoq. Tassa Jan Peter Abelsenip ukiuni qulini piniartuusup puisillu neqaanik ilisimannilluartup akueraa.
Jan Peter Abelsen ukiuni qulini piniartuusoq. Assi: Malik Brøns
- 10-mik nalilerpara. Mamaqaaq, Jan Peter Abelsen oqarpoq.
Ullumikkut misiliititsineq iluatsippoq, igasullu Nuummiunit nalilerneqarluavillutik nuannaarlutik angerlarsinnaapput.
Puisip niuerpalaartumik pilannera
Igasut eqimattat, New Arctic Kichenip puisi aamma misissuiffigaa qanorlu tamakkerlugu atorluarneqarsinnaanera misissorlugu.
- Puisip neqaa tamaat atorluarniarsaraarput puisillu allatut pilanneratigut naleqassusaannik qaffaasinnaaneq misissorparput, Inunnguaq Hegelund oqarpoq. Assi: Malik Brøns
New Arctic Kitchenip Pisiffiullu puisip neqaanik pølseliat sapaatip akunnerata tullianit tunisaalernissaat naatsorsuutigaat.
Ulloq nunatsinni Danmarkimilu nalliuttorsiutigineqartoq
Piniartut aalisartullu ulluat ileqquusumik 1953-imi atuutilersinneqarpoq, tamatumalu saniatigut aalisartut piniartullu kattuffiat pilersinneqarluni.
Ullumikkut ullorsiornermi puiseqqaanniuuttoqarpoq, kaffillertoqarpoq nersornaasiisoqarlunilu kiisalu imaani ajunaarsimasut eqqaaniarlugit naalagiaqatigiittoqarluni.
KNAPK-p ullumikkut ullorsiornermi angutit pingasut maligassiusuusorisatik nersornaaserpai.
Angutit pingasut taakku tassaapput Hermann Hegelund Paamiuneersoq, Johannes Heilmann Nuummeersoq Gabriel Thorleifsenilu Kullorsuarneersoq. Taakku allagartaamik nersornaatisipput 7.000 koruuninnallutillu.
Hermann Hegelund aamma Johannes Heilmann ukiut ingerlaneranni inuussutissarsiuteqarnermi suliaqarluarsimanertik pissutigalugu nersornaatisipput. Gabriel Thorleifsenilu inuup inuuneranik annaassisimanini pissutigalugu nersornaaserneqartoq, KNAPK ilisimatitsivoq.
Aammattaaq Københavnimi Kalaallit Illuanni nalliuttorsiorneq kalaaliminertuunnermik malunnartinneqarpoq, Statens Naturhistoriske Museumillu ulloq Zoologisk Museumimi ilaqutariinnut susassaqartitsinikku aqagu arfininngornermi malunnartissallugu.
Aqagulu niisarnavimik misissueqqissaarneq nunatsinnillu oqaluttuat tusarnaarneqarsinnaassapput kalaallillu qimussertarnerannut allanullu tunngasunik filmiliamik isiginnaartitsisoqassalluni.
