Aalisartut piniartullu ulluanni nersorinninniartoqartoq
Niels Carlo Heilmannip Aningaasaateqarfiata nersornaasiuttagaanik piniartut aalisartullu maligassiuisimasut arfinillit nersornaaserneqarput.
Taakkununngalu ilaapput Aalisartutut piniartutullu ukiuni 70-ini ingerlajuarsimasoq, Paamiormiu Peter Petersen, aamma piniartorsuaq Ittoqqortoormiini najugalik Hjelmer Hammeken.
Niels Carlo Heilmannip Aningaasaateqarfia sinnerlugu siulittaasoq Henrik Sandgreen taama nalunaarpoq.
Piniartoq aalisartorlu Peqatigiiffilerinermillu ingerlatsilluartoq, Thor Eugenius - Nanortalik.
Aalisartutut piniartutullu ingerlatsinermi saniatigut Peqatigiiffilerinermi suliaminik pimoorussilluartoq, Lars Mathæussen – Nuuk.
Ukiorpassuarni aalisartutut piniartutullu ingerlatsiuarsimasoq, Peqatigiiffilerinermilu akuulluartuunermigut maligassiuilluartoq, kiisalu aalisartunik piniartunillu ajunaalersunik marloriarluni annaassisarsimasoq Akisooq Olsen – Sisimiut.
Ukiorpassuarni raajarniarnermik qaleralinniarnermillu ingerlatsiuarsimasoq, Peqatigiiffiup siulersuisuini siulittaasutullu akuujuarsimasoq, kiisalu Kattuffiup siulersuisuunerini ilaasortaasimasoq, Peter Olsen – Ilulissat.
Nersornaat diplomimik takussutissartalik aammalu 5.000,00 koruuninik aningaasartalik nersornaaserneqartunut ingerlatinneqarput.