Aalisartut isertitaat pillugit § 37 naapertorlugu apeqqutigineqarput
Siullermik paaserusuppaa, nunatsinni kommunikkaarluni aalisartut isertitaat ukioq-manna qanoq annertutigisumik nikingatiginersut apeqqutigaa.
Tulliullugit apeqqutigineqarput saarulliit, assagiarsuit, qalerallit raajjallu qanoq annertutigisumik aalisartunit isertitsissutigineqarsimanersut paaserusunneqarpoq.
Agathe Fontainillu apeqquteqaateqarnermini kingulliullugu paaserusuppaa, kommunini assigiinngitsuni aalisartut tunisaqarsinnaanerinut isertitaqarsinnaanerinullu periarfissat ukiup sinneranut qanoq innersut.
Nunatsinni aalisartut atugaasa assigiinngitsorujussuunerat pissutigalugu inatsisartunut ilaasortaq apeqquteqaateqarpoq.
Aalisartut ilaat piffissap sivikikkaluartup iluani naammaginartunik isertitaqartarput. Ilaqarput ilungersoraluaqalutik tunitsiveqarnikkut periarfissaqannginnamik isertitaqarsinnaanngitsut, Agathe Fontain apeqquteqaateqarnermini tunngavilersuuteqarluni ilaatigut taama allappoq, - kommuninili inunnut tuniniaaviit aqqutigalugit taamaallaat isumalluuteqartunik, paragraf 37 naapertorlugu apeqquteqaammi ilaatigut taama tunngavilersuivoq.
Kommunit akornanni aalisarnikkut isertitat aamma assigiinngeqisut apeqquteqaateqartoq isumaqarpoq, taamaattumik ilisimasariaqarparput nunatsinni kikkut isertitatigut ajornartorsiornerpaanersut, Agathe Fontain, inatsisartuni Inuit Ataqatgiit sinnerlugit ilaasortaq, taama allappoq.
Avannaani aalisartut kisimik eqqarsaatigineqarnatik, illoqarfinni nunaqarfinnilu aalisartut aamma eqqarsaatigineqarnissaat, Aalisartut Piniartullu Kattuffiata, KNAPK-p, sapaatip-akunnerani kingullermi kajumissaarutigaa.
