Aalisartut 62-it tunisisinnaajunnaartitaasut
Taavanimi suliffeqarfiup kisermaassilluni qaleralinnik tulaassukkanik tigooraasuusup, Upernavik Seafoodip siulersuisui aalajangersimapput, nunaqarfinni taakkunani marlunni pineqartuni tunitsiviit qaammatini marlunni matoqqassasut.
Tamanna aalisartut ilaqutaasalu inuuniarnerannut, nunaqarfinni taakkunani marlunni tamarmik 200-ngajannik innutalimmi, sunniuteqalereerpoq:
- Ullumikkut meerartannguagut taakkua inuutinniarsaralugit ilungersorpugut. Aammalu atisaqartinniarsaralugit, akiligassallu anartarfiit, eqqaaviit, forsikringit ineqarnermullu. Tamakkorpassuit nammanniarsarigaluarlugit tunisassiorfitsigut ajunngitsumik ingerlatinneqaraluarutta qaleraligut oqarsinnaavunga utaqqiinnaraluartut. Assorsuaq tamanna ajuusaarnarpoq aalisartortatsinnut tunisassiorfitta matoqqavallaartarnera aammalu unikattumik atugassaqartitaasarnerput aallaavigalugu, Jakob Grim, Upernavik Kujallermi aalisartut piniartullu peqatigiiffianni siulittaasoq taama oqarpoq.
Nuussuarmi aamma taamatorpiaq nalaataqarput:
- Uagutsinnut ilaqutariinnut, Nuussuarmiunut ilaasortatsinnut assorujussuaq sunniuteqarpoq. Puisit akuttusoorujussuupput. Taamaattumik juullingajalernerani aalisarsimasuugutta aamma ajorsimassanngikkaluarpoq. Sikuniapiloornerata nalaani aalisanngittoornikuungatta. Kisianni maannakkorpiaq taanna aamma ajornartorsiutigaarput, Thomas Karlsen, Nuussuarmi aalisartut piniartullu peqatigiiffianni siulittaasoq taama oqarpoq.
Upernavik Kujallermi Nuussuarmilu aalisartut Upernavik Seafoodimit decembarip 30-ani paasitinneqarput qaammatini marlunni tulliuttuni tunitsivissaqassanngitsut:
- Qalerallinngooq uninngavallaarlutik qaavi panertarmata. Kisianni isumaqarpunga taamatut aalisartunut siusinaartumik nalunaaruteqannginnerat aallaavigalugu pakasaavallaartumik ingerlatsisoqartoq, Jakob Grim, taama oqarpoq. Tamaammat Upernavik Kujallermiut allagaqarsimagaluarput, maannamulli akineqaratik.
Taamaammat Nuussuarmi Upernavik Kujallermilu aalisartunit paasiuminaatsinneqarpoq sooq nunaqarfinni taakkunani marlunni tunitsiviit containeriusut matoqqatinniarniarneqarnersut nunaqarfinni qanitaanni sivisunerusumik qaleralinnik uninngatitsisoqarsinnaappat:
- Sanilitsinni tunitsiviit ammatinneqartut, kujatitsinnilu, sooq uagut matoqqatitsinermut tassunga tunngatinneqarsimasugut aaqqittariaqaraluarpoq, Thomas Karlsen, Nuussuarmi tunitsivissaqannginnertik pillugu taama oqarpoq.
Nuussuarmiut Upernavik Kujallermiullu nunaqarfimmut qanitaminnut aalisariarnissaminnut periarfissaqaraluarput, kisianni:
- Imaatillugu, taavalu imaq atoruminartillugu, soorunami tunisiartorsinnaanerput ilaatigut atorneqartarpoq. Kisianni Upernavik Kujallerminngaanniit assersuutigalugu Upervimmukassagutta, tassa Upernavik qaninnersaavoq Aappilattorlu, ungasilaarput atukulaneqaranilu, Jakob Grim oqarpoq.
Upernavik Seafoodimit ilisimatitsissutigineqarpoq Nuussuarmi Upernavik Kujallermilu tunitsiviit qaammatini tulliuttuni marlunni matoqqatinneqarnerat Upernavik Seafoodip siulersuisa aalajangigarigaat. Siulersuisunit oqaaseqartitsiniaraluaratta iluatsinngilarput.
