Aalisartoq saarulliit akiisa appariartornerat pillugu: Immaqa nunami suliffissarsioruma

Saarullik sapaatit akunneri marlussuit matuma siornamut sanilliullugu nalikinneruvoq. Royal Greenlandimmi tunisinermit akit sapaatip akunnerata matuma siuliani apparpai.

Oktobarip qulingiluaat sioqqullugu saarullik kiilumut 10,75 koruuninnassutisineqarsinnaavoq. Massakkut 8,25 koruuninnassutigineqarsinnaavoq. Tassa 23 procentimik appariarsimavoq.

Tamannalu umiatsiaararsorluni saarullinniartartup Bent Jeremiassenip iluarinngilaa.

- Akit taamak appasitsigitillugit aalisartoq kinaluunniit akiliisinnaassuseeruppoq, pingaartumik maani Nuummi. Tusakkakka malillugit sinerissami tamanna aamma atuuppoq, oqarpoq.

Bent Jeremiassen qalipaasutut ilinnniarsimavoq. Akit taamak appasitsigimmata nunami suliffissarsiussanerluni eqqarsaatigaa.

- Akit taamak appasitsigiinnarpata qaqissaanga qalipaasunngorlunga, akilli qaffaqqippata soorunami aalisaqqilissaanga, oqarpoq.

Avammut tunisat amerlipput akilli apparlutik

Nuummi Aalisartut Piniartullu Peqatigiiffiat NAPP Royal Greenlandip tunisinermut akigititaanik appaanera pillugu sakkortuumik aamma isornartorsiorpoq. KNAPK-mut saaffiginnissimavoq iliuuseqartoqartariaqarnerarlugu.

- Ingerlaannassappat tamanna piujuartitsinerunngilaq, tunisinermullu akit attanneqassappata naalakkersuinikkut akuleruttoqartariaqassaaq, Niels Eli Boassen, NAPP-mi siulittaasoq, KNR-imut oqarpoq.

NAPP-mit oqaatigineqarpoq akinik aalajangersaanermut tunngaviusut ammasumik nassuiarneqarsimagaluarpata paasinninnerusimassagaluarlutik. Akit taakkoqqissaat paasisinnaanngilaat.

- Akit qaffakkiartuinnavissimapput, Naatsorsueqqissaartarfiullu kisitsisaataasa takutippaat, avammut tunisineq ukiuni kingullerni qaffakkiartorsimasoq, akerlianilli sinerissap qanittuani aalisartunut akigitinneqartut appariartuinnarlutik, Niels Eli Boassen oqarpoq.

Bent Jeremiassenip Royal Greenlandip aalajangiinera aamma paasisinnaanngilaa.

- Akinik sooq appaanerat paasisinnaanngilara. Ukioq ingerlareerpat pisortat millioninik bonusiseqqissapput, oqarpoq.

Akiuunniarput

Royal Greenland saarulliit akiinik appaammat KNAPK siulliulluni qisuariaateqarpoq.

Tusagassiorfinnut sapaatip akunnerata matuma siuliani nalunaaruteqarput, siulittaasup Nikkulaat Jeremiassenip tunisinermut akit nutaat akuerineqarsinnaanngikkai.

- KNAPK-p suliniaqatigiiffittut isumaqatiginninniarnissaq periarfissatuaraa. Taanna aqqutigiumaneqanngippat sinerissamut qanittumi aalisartut katersuuttariaqassapput akiuullutillu, oqarpoq.

NAPP-mit Bent Jeremiassenimillu tapersersorneqarpoq. Akerliunertik nipituumik suaarutigisariaqaritsik isumaqarput.

- Periarfissagut nungungajalerput. Ersatat oqimaallippata, pissutsit oqimaappallaalerpata iliuuseqartoqartariaqarpoq, Niels Eli Boassen, Naalakkersuisunut akerliussutsimik takutitsinissamik nalunaaruteqarsimasoq, oqarpoq.

Royal Greenland apeprsorneqarnissamut periarfissaqarsimanngilaq, kisianni tunisassiornermut pisortaq Lars Nielsen allakkatigut imak akissuteqarpoq:

- Saarulliit niuerfinni nioqqutigineqarneranni akii niuerfinni tamani appariarsimasut takuagut, taamaammat tunisinermut akit niuerfinni akinut malinnaatittariaqarpargut, soorlu aamma tamanna pisartoq akit qaffakkaangata.

- Nioqqutigineqarnerannit akit attanneqarsinnaasimanngillat appariartorlutillu, ilutigitillugulu aningaasartuutigut amerliartorlutik.

KNR-imit Polar Seafood oqaaseqartinniarneqarsimagaluarpoq iluatsinngitsumik.