Aalisarnermut inatsisissap kinguartinnissaa IA-kkut ammaffigaat

Aalisarnermut inatsisissatut siunnersuut Naalakkersuisunit saqqummiunneqarmat isornartorsiorneqarnikooqaaq. Manna Inuit Ataqatigiit inatsisissamik kinguartitsinissamut ammanertik nalunaarutigaat.
Allattoq Mads Pedersen
oktobarip 19-at 2017 15:41

Aalisarnermut inatsimmut allannguutissatut siunnersuut aggustimi tusarniutigineqarluni saqqummiunneqarmat kattuffinnit attuumassuteqartuniillu sakkortuumik isornartorsiorneqarnikuuvoq. 

Assersuutigalugu inatsisissap unitsinneqarnissaa Nunatta Advokatiinit oqariartuutigineqarnikuuvoq, tassani inatsisissap amigaatinik ulikkaarnera massakkutullu isikkoqarluni akuerineqassagaluarpat kingunissai politikkerinit ilisimaneqannginneri tunngavilersuutaallutik.  

Soorlu Sulisitsisut Kommuneqarfik Sermersoorlu aamma taamak isumaqartut. 

Inuit Ataqatigiit sinnerlugit Inatsisartuni ilaasortap, Hans Aronsenip, Aalisarnermut Ataatsimiititaliami aamma siulittaasuusup, partii sinnerlugu oqariartuutigaa inatsisissaq unitsiinnarneqarsinnaanngitsoq. 

Taamaakkaluartoq, naallu Naalakkersuisoqatigiit isumaqatigiissutaanna allassimagaluartoq "Aalisarnermut inatsit naammassineqassasoq", Inuit Ataqatigiit inatsisissamik aalajangiinissap aappaagumut Inatsisartunut qinersisoqareernissaanut kinguartinneqarsinnaanera ammaffigaat.

AAMMA ATUARUK Sanngiinnerit aalisarnermut inatsisissamit eqqugaasinnaasut

Qulaajagassammi misissugassallu amerlasut oqaatigineqarpoq. 

- Ilaatigut apeqqutinik annertuunik inatsisissatut siunnersuutigineqartumi qulaarneqarsimanngitsunik amigaateqarpugut, Hans Aronsen KNR-imut oqarpoq. 

Aronsen isumaqarpoq inatsisissap aningaasaqarnikkut kingunissai Naalakkersuisunit misissorluarneqartariaqartut. Inatsisissalli unitsiinnarneqarnissaa isumaqatiginagu. 

- Unitsiinnarnagu suliaasartai ingerlasariaqarput. Pingaarutilerujussuuvoq, allaat qinersisoqareeraluarpalluunniit tamanna ingerlasariaqartutut naatsorsuutigisariaqarparput, Aronsen oqarpoq. 

AAMMA ATUARUK Siunnersuut akisussaassuseqanngitsuliorneruvoq

Taassuma aamma erseqqissarpaa inatsisissap suliarineqarnerani attuumassuteqartut tamarmik akuutinneqarnissaat pingaaruteqartoq. 

AAMMA ATUARUK Aalisarneq pillugu inatsisissatut siunnersuut akisusinnaasoq