Aalisarnermut ataatsimiititaliap Lyberth suleqatigerusukkaluarpaa
Ataatsimiititaliaq Karl Lyberthimik suleqateqarusullunilu nalunaaruteqarpoq, aammali Karl Lyberth isornartorsiorlugu. Ataatsimiititaliammi paasisinnaanngilaa sooq Karl Lyberth, ataatsimiititaliamut attaveqartarnini pitsaanngitsuusoq nassuerutigisinnarlugu pitsanngorsaaniarluni suli iliuuseqarsimanngimmat.
-Ataatsimiititaliap Naalakkersuisunut ilaasortaq suleqatigerusuppaa, taamaattorli Naalakkersuisunut ilaasortap akunnialunnguanik periarfissiilluni sammisassatullu kissaatigineqartut nassuiaateqarfiginagit ataatsimiigiaqqusisarnera ajornartorsiutitut isigalugu. Taamaattumillu ataatsimiittarnerit suleqatigiinnit piareersarnissamulluunniit periarfississutigineqanngitsut ingerlanneqarnissaannut suleqatigiinnerup qanoq pitsanngortinneqarsinnaanera takorlooruminaappoq, ataatsimiititaliap siulittaasua Nikolaj Jeremiassen oqarpoq.
Aalisarnermut ataatsimiititaliaq nalunaaruteqarluni Lyberth kajumissaarpaa ataatsimiititaliamik suleqateqarneq siuarsaqqullugu, kiisalu aamma susassaqarfimmi apeqqutit attuumassuteqartut pillugit ataatsimiititaliamut paasissutissiillunilu akuutitsisaqqullugu.