Aalisarnermik Naalakkersuisoqarfimmi immikkoortortami pisortaq: -Isertortumik isumaqatigiissuteqartoqanngilaq

Atlantikup avannaani 2014-imut avaleraasartuunik pisassiissutissat isumaqatigiinniutigineqarneri ippassaq unnukkut ajalusoorput.

Isumaqatigiinniarnerit Skotlandip illoqarfiisa pingaarnersaanni Edinburghimi ingerlanneqarput, isumaqatigiittoqarnissaalu anguniarlugu ullormik ataatsimik sivitsorneqaraluarlutik. Illuatungeriilli EU, Norge, Rusland, Island, Savalimmiut aamma Kalaallit Nunaat ulluni pingasuni isumaqatigiinniareerlutik isumaqatigiissuteqaratik avissaaginnarput. Fiskeritidende taama allaaserisaqarpoq.

-Makrel pillugu isumaqatigiinniarnermi Norgemiit oqaatigineqarsimavoq EU kalaallit nunaallu isertortumik isumaqatigiissuteqarnerat tunngavigalugu Eu annertoorujussuarmik nunatsinni avaleraasartuunik aalisarsinnaasoq, soorunami taanna eqqunngilluinnarpoq, Emanuel Rosing oqarpoq.

Emanuel Rosingip erseqqissarpaa, Kalaallit Nunaat EU-llu isumaqatigiissutaat taannaaginnartoq aamma taamaattuaannartoq. Tassa Kalaallit Nunaat EF-miilli animmat isumaqatigiissut suli taannaajuaannartoq.

Aalisarnermut nalunaarsuinerit aaliangiisuusarput EU imartatsinni qanoq annertutigusimik aalisassanersut.

Tassungalu atatillugu Kalaallit Nunaat ikiorsiinissanut aaqqiissutissanut assigiinngitsunut hunnoruju millioninit arlalinnik pissarsisarpoq.

Tamannali isumaqanngilaq EU aalisarnermut Kalaallit Nunaata pisassiissutaasa 100.000-it affai pisinnaagaat. Kisianni isumaqatigiissut imaappoq: Kalaallit Nunaat EU-lu aaqqissuusseqqaarneratigut  EU misileraalluni nunatsinni aalisarsinnaavoq. Taamaalilluni pisassiissutit misileraanermi aalisarneqartarput.

-Aalisarneq pillugu isumaqatigiissummut tapiliussamut aaliangersagaqarpoq. imatut oqaasrtaqartunik, illuatungeriit isumaqatigiippata misileraaneq ingerlalluarsimasoq, taava nunatta EU-mi aalisariutillit 50 %- angullugu pisassat nutaanik pisassissinnavaa, Emanuel Rosing oqarpoq.

Ilanngullugu taassuma eqqaavaa ukiut marluk kingulliit EU makrelinik aalisarnissamut 1,4 tusin tonsinik misileraanissamut pisassinneqarsimasoq. Taava isumaqatigiissut isumaqarpoq EU 700 tonsimik pisassinneqarsinnaasoq.