Aalisarneq pillugu paasissutissat siunissami paatsuugassaassanngillat
Pisat tamakkiisumik nalunaarutigineqartarnerat – aalisarnermik aqutsinermi piujuaannartitsiniarfiusumi pisariaqarluinnalersoq, Atlantikup avannaani aalisarnermut naalakkersuisut 15-issaanik ataatsimiinneranni O´Leary, Prince Edward Island, Canadami 5.-8. juulimi pisumi oqariartuutaavoq.
- Pisat tulaanneqartullu allat tamarmik tamakkiisumik nalunaarutigineqartarnissaat anguniarlugu aalisarnermik aqutsisut naalakkersuinikkut ingerlaatsinik malittarisassanillu pitsaasunik ineriartortitsisariaqarput. Taamaaliornikkut periaatsit kikkunnit tamanit paatsuungassutigineqartassanngillat, aammali tamatuma saniatigut aamma nunat marlukkaarlutik eqqaamioriikkuutaarlutilluunniit pisassiissutigisartagaat tutsuuigineqarlutik ataqqineqartalissapput. Tamatumani atortorissaarutit iluaqutaassapput paasissutissanillu aveqatigiittarnissamut aqqutissiuisinnaassalllutik, Aalisarnermut naalakkersuisoq, Canadami ataatsimiinnermi, O'Leary, Prince Edwardimi pisumi peqataasoq oqarpoq.
Aalisarnermut Naalakkersuisut taakkulu sinnissaasat pisat pitsaanerusumik nalunaarutigineqartarnissaat nunat marlukkaarlutik arlalikkaarlutilluunniit suleqatigiissutiginissaannik isumaqatigiissuteqarput ilisimatuullu pitsaanerusumik suleqatigiinnissaat tapersersorlugu.
Gail Shea, Canadami Aalisarnermut Imartanullu Naalakkersuisoq, kiisalu Randy Kamp, Inatsisartut Aalisarnermut Imarpinnullu Allattaanerat Atlantikup Avannaani Aalisarnermut Naalakkersuisut 15-issaannik ataatsimiinneranni qaaqqusisuupput.
Savalimmiuni, Kalaallit Nunaanni, Islandimi, Norgemi Russillu Naalagaffianni aalisarnermut naalakkersuisut, taakkuluunniit sinniisaat ataatsimiinnermi peqataapput kiisalu Europamiut Imartat Aalisarnerlu pillugit Kommissæreqarfiannit aallartitaq aamma peqataalluni.
Atlantikup avannaani aalisarnermut naalakkersuisut 16-issaannik ataatsimiinnerat 2011-imi Islandimi pissaaq.
