Aalisariutit nutaanngitsut isaterneqarnissaannut oqallinnermut IA ilannguppoq
- Aalisarnermut Naalakkersuisup aningaasaliissutissatut aalisarnermut immikkoortitat pillugit radiokkut oqaaseqarnermini, KNAPK paasinerluisimanerarlugu oqarnera eqqunngilaq. Tamanit takuneqarsinnaavoq Naalakkersuisut aningaasanut initsisissatut siunnersuutaanni, angallatinik isaterinissamut aningaasat 20 mio. kr.-nik amerlassuseqartut nungutinneqarnissaat siunnersuutigineqartoq. Taamaattumik KNAPK-p eqqortumik tikkuaanera tassuuna uppernarsarneqarsinnaavoq.
Inuit Ataqatigiit politikkikkut oqaaseqartartua, Aqqaluaq B. Egede tusagassiutinut nalunaarummini ilaatigut taama aallarniivoq imalu nangilluni allalluni.
- Aningaasaliissutit nungutinneqarniarnerinut Aalisarnermut Naalakkersuisup tunngavilersuutigaa, angallatinik isaterinissamut aningaasaliissutit atorneqartannginnerat. Kisianni Naalakkersuisup minnerpaamilluunniit eqqanngilaa, aningaasat pineqartut angallatinik isaterinissaannarmut aningaasaliissutaannginnerat.Aqqaluaq B. Egede allappoq aamma ima nangilluni.
- 20 million koruunit siunertanik makkunannga siunnerfilinnut atugassatut aningaasaliissutaapput: Aalisariutinik nutarterineq, misileraalluni aalisarneq, aalisartut iluaqutigisinnaasaannik ineriartortitsineq, aalisariutinik naleqqussaaneq kiisalu angallatinik isaterinissaq, Aqqaluaq B. Egede allappoq imalu nangilluni.
- Taamaammat angallatinik isaterinermut aningaasaliissutaasartut atorneqartannginnerat kisiat tunngavilersuutigalugu aningaasaliissutinik atorunnaarsitsiniar-neqpissusissamisuunngilaq. Pingaartumillu eqqarsaatigigaanni Naalakkersuisup inatsisip aporfiusartup Inatsisartut ukiaanerani ataatsimiinneranni allanngortinneqarnissaa pissasoq oqaatigereernikuugaa, qularutigineqarsinnaanngilaq aningaasaliissutit pisariaqartinneqarlualissasut, Aqqaluaq B. Egede ilaatigut taama tusagassiutinut nalunaarummini allappoq.