Aalisariutit apornerat ataatsimiititaliarsuarmit misissuiffigissagaat

Imaani ajunaartoqartillugu ataatsimiititaliarsuup aalisariutit marluk apornerat sumik aallaaveqarnersoq misissuiffigaa.
Polar Seafoodip aalisariutaa Polar Nataarnaq, Royal Greenlandip aalisariutaanut Aka Malimmut aportoq. Assi © : KNR
Royal Greenlandip aalisariutaa Aka Malik, Polar Seafoodip aalisariutaani Polar Nataarnamit aporneqartoq. Assi © : KNR
Allattoq Marie Kûitse Kristensen, Ann-Sophie Greve Møller
januaarip 09-at 2023 15:47

Royal Greenlandip kilisaataataa Aka Malik aamma Polar Seafoodip kilisaataataa Polar Nataarnaq Maniitsup avataani arfininngormat unnukkut aporput.

Ajutoorneq qanoq pisimanersoq pillugu suliffeqarfissuit taakku marluk KNR-imiit oqaaseqartinniarlugit atavigigaluarpagut.

AAMMA ATUARUK Kilisaatit marluk Maniitsup eqqaani aportut

Imaani ajunaartoqartillugu ataatsimiititaliarsuulli misissuineq suli ingerlammagu suliffeqarfiit oqaaseqarsinnaannginnerarput.

Polar Seafoodimi kilisaateqarnermi fabrikkimilu pisortap tullia, Bant Salling KNR-imut mailikkut ima allappoq:

- Qujanavissumik inunnik ajoqusertoqanngilaq. Massakkorpiaq oqaaseqarsinnaanngikkallarpugut misissuinerit ingerlanneqarmata.

Royal Greenlandimi aalisariummi Aka Malimmi inuttat ajornartoorsimasutut ikiorneqarnissamik neqeroorfigineqartut attaveqaqatigiinnermut pisortaq, ullumi ilisimatitsivoq.

Pisumut tunngatillugu Kalaallit Nunaanni politiit paasiniaaffigaagut, taakku Imarsiornermut aqutsisoqarfimmut innersuussipput.

Imaani ajunaartoqartillugu ataatsimiititaliarsuaq aalisariutini misissuileruttortut, Imarsiornermillu Aqutsisoqarfiup misissuisarnermi pisortaa, Martin Hvid John, oqarpoq.

Unioqqutitsisoqarsimanersoq paasiniarneqartoq

- Suna ajutoornermut peqqutaanersoq Imaani Ajunaartoqartillugu ataatsimiititaliarsuup maanna misissussavaa. Taava misissuinerit naammasseriarpata arlaannik malittarisassanik unioqqutitsisoqarsimanersoq akisussaatitsisoqassanersorlu Imarsiornermut Aqutsisoqarfimmiit nalilissavarput.

Misissuineq qanoq sivisutigissanersoq naatsorsuutigaasiuk?

- Oqaatigiuminaappoq. Ajutoornermut suup peqqutaanerata misissorneranut tunngatillugu Imaani Ajunaartoqartillugu ataatsimiititaliarsuup  misissuinera innersuussutigisariaqarpara.  Taava umiarsuit uagut misissorpagut, taava ajoqusernerisa iluarsaannissaat piginnittuisa isumagissavaat, Imarsiornermillu Aqutsisoqarfiup misissuisarnermi pisortaa, Martin Hvid John KNR-imut oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk