Aalisakkat nutaat arlaqartut ilisimatuunit nalunaarsorneqarput

Nunatta imartaani aalisakkat nutaat allattorsimaffianni 1992-imi ilanngussisoqarnerata kingorna aalisakkat nutaat ukiormanna ilanngunneqartut 57-iupput.

Taakkunannga 47-t nunarsuatsinni allami ilisimaneqareerput, aatsaalli Nunatta imartaani naammattoorneqarlutik. Taakkunanngali aalisakkat qulit aatsaat nassaarineqarput, ilisimatusartunillu aatsaat naammattoorneqarlutik.

Aalisakkat nutaat nassaarineqartut itisoormiuupput, 400 meterit missaannik itissusilimmiinngikkunik itinerusumiillutik. Soorlu taakkununnga ilaapput eqalussuit ilaat assigiinngitsut marluk, Islandimiut kattehaj-iat aamma Portugalimiut fløjshaj-iat aamma itisoorsuup tudsefiskii assigiingitsut arlallit.

- Aalisakkat nutaat silap pissusaata allanngoriartorneranik pissuteqarnersut oqaatigissallugu nalorninartoqarpoq, fiskekurator Peter Rask Møller, Zoologisk Museumimeersoq, oqarpoq.

- Ilisimatusartut takkuitsuugaannik aalisakkat nutaat

arlaat aalisartut ilaannit pisarineqarsimasinnaavoq. Siusinnerusumut naleqqiullugu maannakkut aalisartoqarnerujussuuvoq - pingaartumik itisuumi, taamaammat aalisakkanik qaqutigoortunik pisaqarnissaq annertunerulerpoq, Peter Rask Møller nassuiaavoq.

- Ilimagaarput silap kissatsinnerunera pissutaalluni nassaarineqartut nutaat tallimat takkussimassasut, Peter Rask Møller nangippoq.

Taakku tassaapput qallunaatut taaguutillit Laksesild, hvilling, blåkæft, havtaske aamma snippe - tamarmik Danmarkip imartaanni aamma naapitassaasut.