Polar Fish Aalisakkat nioqqutigineqartut pitsaasuunissaat Jeremiassenip pingaartippaa
Aalisarneq pillugu Sisimiuni saqqummersitsineq, Polar Fish aalisarnermut naalakkersuisumit, Nikolaj Jeremiassenimit tallimanngormat aallartinneqarpoq.
Nunatsinni aalisakkanit tunisassiat pitsaasutut nalunnginneqartut Nikolaj Jeremiassenip saqqummersitsinerup aallartinnerani oqalugiarnermini erseqqissaatigaa. Tunisassiallu taama isumaqarfigineqarnerat paarineqarluassasoq, naalakkersuisup oqaatigaa.
Aalisakkat nungusaataanngitsumik amusat niuffaffinnit piumasarineqaleriartortut, aalisakkallu tulaassat tunisassiarineqarnerisalu pitsaasuunissaat, Nikolaj Jeremiassenip aamma erseqqissaatigaa. Aalisakkallu qeritinneqanngitsut pisisartunit niuerfinniillu piumaneqarnerulissasut, naalakkersuisup ilimagaa.
- Aalisagaatigut qaleruallillu aalisartakkagut isumatusaartumik aalisarneqarlutillu ingerlanneqassapput. Imartatsinni aalisakkat qaleruallillu nunguitsuunngillat. Illuatungaanili pitsavimmik pitsaassuseqartuupput, aalisarnermut naalakkersuisoq Nikolaj Jeremiassen oqalugiarnermini ilaatigut oqarpoq.