Aalisakkanit avammut tunisanit isertitat qaammatit siulliit arfineq marluk ingerlaneranni 100 millionit koruunit sinnerlugit ikilisut
Aalisakkat pingaaruteqarnerit kiilumut akii qaammatit siulliit arfineq marluk ingerlaneranni appangaatsiarput, tamannalu nunatsinni aalisakkat avammut tunineqartut ataatsimut nalinginut appangaatsiartitsivoq.
Avammut tunisat nalingi ukioq manna januaarimiit juulimut siorna piffissamut tassunga sanilliullugit 129 millionit koruuninik apparsimasut, Nunatta naatsorsueqqissaartarfianit kisitsisit nutaat takutippaat. Tamanna 4,7 procentimik appariarnerup assigaa.
Raajat saarulliillu akii pingaartumik apparsimasut, naatsorsueqqissaartarfimmit 2020-mi januaarimiit juulimut aalisakkat avammut tunisaanerannik nalunaarusiami allassimavoq.
Sulisitsisut: Nunanik matusinernut toqqaannartumik atassuteqartoq
Akit appangaatsiarnerat nunarsuup annersaani Covid-19-ip tuniluunneranut toqqaannartumik atassuteqarput, tamannami neriniartarfinnut neriartortarnitta ikilingaatsiarneranik kinguneqarpoq.
Sulisitsisuni aalisarnermut, inuussutissanut avammullu niuernernermut ataatsimiititaliami siulittaasoq aamma Polar Seafoodimi siulittaasoq, Henrik Leth taama oqarpoq.
Kiilumut akii ima appartigaat
Aalisakkat pingaarnerit kiilumut akii ukioq manna qaammatit siulliit arfinillit ingerlaneranni siorna piffissamut tassunga sanilliullugit appariarput.
- Raajat kiilumut akii 11,3 procentimik apparput.
- Saarulliit kiilumut akii 10,1 procentimik apparput.
- Qalerallit kiilumut akii 6,1 procentimik apparput.
- Nunarpassuit coronamik nunarsuaq tamakkerlugu tunillaassuuttoqarnerani matorarput. Tamanna neriniartarfiit sutortarfiillu assersuutigalugu matoqqanerannik kinguneqarpoq. Taamaalillunilu tunisarpassuarisartakkagut taakkununnga tunineqartarnatik. Tamakkua taarsiullugu allani tunisariaqarpagut, taamaalimmallu tuniniagarpassuaqalerpoq akillu taamaammat apparput, taanna nassuiaavoq.
Ukiumut appartarnera tallimariaammik annerusinnaasoq
Henrik Lethilli aalisarnermit akit ukiumut apparnerat naatsorsueqqissaartarfiup ukiup affaani siullermi nassuiaataanit ajornerungaatsiaratarsinnaasorai.
- Siulittoruminaappoq, uanili nassuiaatigineqartumit annerungaatsiassaaq. Immaqa sisamat tallimariaammik annerussaaq. Tassalu akit malunnartumik apparput, taanna oqarpoq.
Tassami akit ilumoortumik apparnerat niuerutip ingerlaarfiani tamarmi maannamut suli malunniutinngillat. Pisiniarfinni assigisaannilu pisisartut aalisakkanut akiliutigisartagaat, akit agguaqatigiisillugit procentinik tallimanik ukiup affaani siullermi apparnerannit apparneroqaat.
Aalisakkanik avammut nioqquteqarnerup nalinga januaarimit juulimut 2.650 millionit koruuniuvoq.
Iluarsiineq neriuallatsisoq
Ullumikkulli saqqummersumut 2020-mi januaarimiit juulimut aalisakkat avammut tunisaanerannut aaqqiissut 118 millionit koruuniusoq neriulluaataavoq.
- Aaqqiissuteqarneq nalunaaruteqarnissamut piffissaliussap qaangiutereernerani avammut tunisanik Akileraartarnermut aqutsisoqarfiup qarasaasiaatigut aatsaat nalunaarsuisoqarsimanernik pissuteqarpoq, naatsorsueqqissaartarfik allappoq.