Aalisakkanik tukertitsivik aallarnisarpaat

Savalimmiuni sulliviit ingerlatsiviusut arlallit ataatsimmoorussillutik aalisakkanik tukertitsivimmik piginneqatigiilerput, piginneqatigiiffillu taanna Bakkafrost Holding-imik ateqartippaat.

Pilersaarutaavoq tunisassiorneq ingerlalluariarpat ukiumut aalisakkat 11.500 tonsit suliarineqarsinnaasassasut.

Piginneqatigiiffiup aallarteqqaarnerani inuit 120-t missaat sulisorineqaqqaassapput, Bakkafrost Holdingili siunissami ingerlallualeriarpat naatsorsuutigineqarpoq suliffeqarfiit 200-t pilersinneqarumaartut.

Savalimmiuni aalisakkanik tukertitsineq inuussutissarsiutit pingaarnersaattut taaneqarsinnaasoq siusinnerusukkut ajornartorsiungaatsiarpoq, tassami aalisakkat tuniluuttorujussuarmik nappaateqaleraluarmata aalisakkat akii appariarujussuarput. Taamaalimmat nunanut tamalaanut aalisakkanik tunisiniarneq ajornakusuulerpoq savalimmiormiunullu tukertitsiviutilinnut aningaasanik millionerpaalunnik annaasaqaataalluni.

Maannalu tassa kingumut Savalimmiuni imaani tukertitsisartut kingumut nikussaaqqipput, Savalimmiunilu inuussutissarsiutit pingaarnersaata tullianik tukertitsivimmik pilersitsillutik.