Aalisakkanik nakkutilliisarfissat pilersinneqassapput
Killeqarfinni nakkutilliisarfinnik Nuummi ataatsimik aamma Sisimiuni ataatsimik pilersitsisoqassaaq. Killeqarfinni nakkutilliisarfiit sananeqarnissaat ingerlanneqarnissaallu aalisakkanik avammut tunisassiornermik inuussutissarsiuteqartunit atuisunillu aningaasalersorneqassapput, taavalu Royal Arctic Line A/S aamma KNI A/S sullissisutut inississimassallutik.
Kalaallit Nunaata EU´p aalisakkanik nakkutilliisarfigisaanut ilanngunneqarnissaa pillugu, Kalaallit Nunaat, Danmark aamma EU 2011-mi isumaqatigiissuteqarput. Tassalu kalaallit aalisakkanik tunisassiaat EU´mut eqqunneqarnerminni misissorneqartarunnaassapput, tamatumalu kingunerisaanik inuussutissarsiornermi aningaasartuutinit malunaatilimmik sipaagaqartoqassaaq.
Isumaqatigiissulli atuutilissappat piumasaqaataavoq, killeqarfinni nakkutilliisarfimmik minnerpaamik ataatsimik, aalisakkanik tunisassianik, nunanit, EU´p aalisakkanik nakkutilliiffigisaaanut ilaanngitsunit tulaanneqartunik misissuisartussamik sanasoqarnissaa.
Assersuutigalugu aalisakkat Canadameersut EU´p aalisakkanik nakkutilliiffigisaaanut ilaanngillat.
Angallatit 39-t, nunanit allaneersut pisaminnik nunatsinnut 2010-mi tulaassisimasut Royal Arctic Line A/S ilisimatitsivoq. Taakkunannga 19-it pisatik Nuummut Sisimiunllu tulaassuimavaat.
Killeqarfinni nakkutilliisarfiup pingaarnerup Nuummiinnissaa nunallu immikkoortuani killeqarfimmi nakkuktilliisarfimmiup Sisimiuniinnissaa, aalisakkanik avammut tuniniagaqarnermik inuussutissarsiutillit sullissisullu ataatsimoorlutik, aammalu Namminersorlutik Oqartussat isumasioqatigereerlugit aalajangerpaat.
EU´p aalisakkanik nakkutilliisarfigisaa tassaavoq nunat ilaasortaasut aamma ilaatigut Norge, Island Savalimmiullu. Canada Ruslandilu tassuga ilaanngillat.