IKIORTARIALLIT Aalborgimi aqutsisoq: Aningaasat pineqaratik ilisimasat pineqarput
Kalaallit inooqataaniarnikkut ajornartorsiortut ikiorsernissaannut Danmarkimi kommunit aningaasaliissutigisaat assigiinngiiaartupilussuupput. Assersuutigalugu Københavnip suleqatigiissitamut kalaallinut ikiortarialinnut isumaginninnikkut suliniutissanik misissuisussamut 100.000 koruunit aningaasaliissutissatut immikkoortissimavai, Esbjergillu Kommuniata ornittakkanut kalaallinuunerusoq atugassianut marlunnut 1,6 millionit koruunit immikkoortissimallugit.
Aningaasalli amerlassusaat pingaarnerpaajunngilaq.
Kalaallit Nunaannit Danmarkimut nuunnermi ajornartorsiutaasinnaasut paasilluarnissaannut politikkikkut piumassuseqartornissaa pineqarpoq, Aalborgip Kommuniata Kalaallinut sullissiviani aqutsisoq, Jeppe Bülow Sørensen, taama oqarpoq.
- Kommunimi innuttaasut allat sullinneqartarnerisulli tuninissaannut (kalaallit, aaqq.) allaanerusumik iliuuseqarnissamut politikkikkut taperserneqarnissaq pineqarpoq, KNR-imut taama oqarpoq.
Aamma atuaruk Danmarkimi kalaallinut ajornartorsiortunut kommunit ikiuutissaat assigiinngeqisut
10 mio. koruunit allannguutaanavianngillat
Aalborgip Kommunia Kalaallinut sullissivimmik taasamik ukiuni kingullerni ingerlataqarpoq, tassanilu sulisut ingerlatsiviit pitarlugit suleqatigiillutik kalaallit inooqataaniarnikkut ajornartorsiortut sullinneqarput. Taamatut aaqqiissuteqarnermi ikiorneqarnissamik pisariaqartitsisut saaffigisassaat ataasiinnanngortinneqarpoq.
- Kalaallit Nunaanneersut ajornartorsiutigisartagaannik aammalu sunik pisariaqartitsisoqarsinnaaneranik paasisimasalinnik tassani siunnersorteqarpoq, Jeppe Bülow Sørensen taama oqarpoq.
Kalaallimmi inooqataaniarnikkut ajornartorsiortut Danmarkimi pitsaasumik inuuneqalernissaannut immikkut ittumik suliniuteqarfiginissaannik pisariaqartitsisoqartartoq ilisimavarput - kommunilli susassaqarfimmut aningaasanik qanoq amerlatigisunik atuinersoq tamatumani apeqqutaasariaqanngilaq.
- Tupinnartuliorsinnaanngilagut. Aamma aningaasaliissutit 10 millionit koruuninik ilaneqaraluarpata aamma taamaaliorsinnaanissarput ilimagivallaanngilara. Aamma eqqumaffiginerusariaqarunartoq tassaavoq aningaasarpassuit atorlugit inuit tikiinnartut tasissiutiinnaraanni nammineersinnaassusiannik arsaarneqassammata, Jeppe Bülow Sørensen oqarpoq.
Aamma atuaruk Kalaallit Illuutaat nuuttunik nalunaarsuiniartut
Pisortaq: Aningaasat amerlanerusut pisariaqartippagut
Aarhusimili Kalaallit Illuutaanni pisortaq Jørgen Holbech isumaqataanngilaq. Illoqarfiup siulersuisuisa - Aalborgimituulli - kalaallinut inooqataaniarnikkut ajornartorsiortunut immikkut suliniuteqarnissamik pisariaqartitsisoqarneranik isumaqarnerat iluaraa.
Kalaallilli Illuutaata Aarhusip Kommunianit tapiissutaasut 400.000 koruunit missaanniittut tamakkerlugit kalaallinut inooqataaniarnikkut ajornartorsiortunut atortarpai.
- Kalaallinut inooqataaniarnikkut ajornartorsiortunut aningaasat atortakkagut kommunimit tapiissutaasartunit amerlanerupput, Jørn Holbech oqarpoq nangillunilu:
- 'Naammattunik' atuisoqarnersoq akissallugu nalunartuaannarpoq. Kalaallit Illuutaat, Aarhusip Kommunia namminersortullu suliniutitigut suleqatigiilluartupilussuupput. Suliatsinnulli tunngatillugu eqqumaffigineruneqarnissaa nukiillu amerlanerusut atorneqarnissaat soorunami kissaatigigaluarpara.
Taanna isumaqarpoq Jeppe Bülow Sørensen atorfigisani tunngavigalugu immaqa taamatut oqaaseqaateqartoq.
- Imaassinnaavoq kommunimi atorfilittap aningaasat apeqqutaannginnerinik oqaaseqarnera politikkikkut naapertuunnerusoq. Kisianni aningaasat immikkoortinneqartut aamma apeqqutaasarput, Jørn Holbech taama oqarpoq.