Aalborg nunarpullu suleqatigiinnissamik isumaqatigiissuteqarput
Ilaqutariit inuuniarnermikkut ajornartorsiortut Danmarkimut nuunnerinut atatillugu, ilaqutariit ajornartorsiutaannik kommunit ilisimatitseqatigiittarnissaannik qanimut suleqatigiittarnissaq pilersinneqarpoq, Aalborgip kommuneata KANUKUKA aamma Kommuneqarfik Sermersooq augustimi ataatsimeeqatigiimmata.
Naapeqatigiinneq allakkatigut isumaqatigiissutaavoq, neriuutigineqarporlu ulluinnarni inunnik sullissineq pitsaanerusumik ingerlanneqartalissasoq.
- KANUKOKA-p ilisimappagu uagut qanoq ikiuisarnersugut aammalu Kalaallit Nunaanni kommuneni ataasiakkaani attavigisaqalerutta, taava ilaqutariit ikiorniakkagut ikiortikkusuppatalu, tamanna ajornannginnerusumik anguneqarsinnaavoq. Taassuma pilersissavaa ilaqutariit nuutttut pitsaanerpaamik ikiorneqartalernissaat taamaalillutalu taakku nakkaattooqqinnginnissaat pineqarsinnaalluni, Hanne Manata Aalborgip kommunianiit oqarpoq.
Isumaqatigiissut allaganngorlugu suliarineqareerpoq, atsioqatigiinnissarlu utaqqisaaginnalerluni. Sapaatip akunnerata tulliani imaluunniit ullut 14-init qaangiuppata atsioqatigiinnissaq pissasoq, Hanne Manatap ilimagaa.
Nunatsinnit Danmarkimut inuit nuttut pillugit ilisimatitseqatigiittarnissap piviusunngortinneqarnissaa, Nunatsinni Isumaginninnermut Naalakkersuisup, Mimi Karlsenip aamma Qallunaat Isumaginninnermut ministeriata, Karen Hækkerupip sisamanngorpat naapeqatigiinnissaminni oqaluuserisassaasa ilagaat. Ilisimatitseqatigiittarnissamut maanna kinguaarsaataasartoq tassaavoq inatsisitigut tamanna suli aqqutissiuunneqarsimanngimmat.
Inatsisitigut tunngavissaqannginnerup pilersittarpaa, Aalborgip kommuneata aamma Kommuneqarfik Sermersuup suleqatigiinnissamut killilersimaarneqarnerat.
- Inatsisit massakkutut itsillugit allatut iliorsinnaanngilagut. Taamaattumik Kalaallit Nunaanni kommunit eqqumanerusariaqarput inuit kommuninut allanut nuunneranni kommunimut nuuffigisaannut aqqutit suut atorlugit paasissutissanik tunniussisoqartarnissaanik. Tassalu maannakkumuugallartoq Aalborgip kommunenia kisimi paasissutissanik paarlaasseqatiginnissamik qanoq iliuuseqartuuvoq, Hanne Manata oqarpoq.
Taassuma ilanngullugu oqaatigaa, kommunit akornanni suleqatigiinneq ajunngitsumik ingerlagaluartoq taamaattorli aalajangersimasunik tunngavissaqannginneq kinguarsaataasoq. Suleqatigiinneq maannakkutut ittoq eqqarsaatigissagaanni taava kommunini taakkunani inuit sullissisut qanimut suleqatigineqarneri apeqqutaapput.
- Isumaqatigisatta kiinarsinissaat pingaaruteqarpoq, taamaaliornikkut suleqatigiinneq pitsaanerusoq anguneqartarmat. Maannali tassa siulliullugu suliassaraarput, inunnik ataasiakkaanik isumalluuteqarpallaarata suliamut attuumassuteqartut tamarmik ilisimasaannik sullisseriaatsimik nassaarnissarput, Aalborgip kommuneani inunnik isumaginninnermut pisortaq, Hanne Manata taama oqarpoq.
