Aalakoorluni umiatsiamit nakkarsimasoq annaanneqarpoq
Takornariat Luffemilu inuttat Ilulissat avannaani Oqaatsut eqqaanni umiatsiaq inuttaqarani kaaverusaartoq takoriasaarpaat. Tassanilu Luffep naalagaata Ilulissani Politiit unnukkut qulingiluat missaanni attaveqarfigai, umiatsiaq inuttaqarani kaavittoq pillugu, tassungalu atatillugu ajunaartoqarsimasinnaanera nalunaarutigalugu.
Taamaannerani Luffe umiatsiap tungaanut ingerlatinneqarpoq, umiatsiallu eqqaani immami angut ilisimanngitsoq nassaarineqarpoq.
Luffemi inuttat angut qaqippaat, qaqereerlugulu malugilerpaat angut suli anersaartortoq, Ilulissallu napparsimmaviannut erniinnaq aallaruppaat.
Angut 61-inik ukiulik Ilulissat napparsimmavianni aaversippoq, aavalu promilleqartoq paasineqarpoq, taamaalilluni angut umiatsiamit imaanut nakkarnermi nalaani aalakoorsimasoq paasineqarpoq.
- Takornariartaat Luffe umiatsiap eqqaatungaaniimmat angut 61-inik ukiulik iluatsitserujussuarpoq, tassami nassaarineqarluni annaanneqarpoq, Ilulissani politiit ittuat, Janus Eigaard, oqarpoq.
Angutip 61-inik ukiullip tuparujussuaqqanera pissutigalugu arfininngormat killisiorneqanngilaq. Angulli aalakoorluni umiatsiamik angalasimanini pillugu kingusinnerusukkut unnerluutigineqarumaarpoq.
