Aajuna naalagaaffeqatigiit issittoq pillugu aallartitaat

-  Kalaallit Nunaat soqutigisorujussuuara, Kalaallinullu unammilligassat suunersut aamma eqqumaffigilluartuullugit. Issittoq pillugu aallartitanngorlaap taassuma Danmarkimi nunanut allanut tunngasunut ministeri Villy Søvndal aamma Naalakkersuisut siulittaasuat Kuupik Kleist naapereerlugit ullumi taama oqaaseqarpoq.

- Issittumut tunngassutillit naalagaaffeqatigiittut sulissutigilluartussaavavut. Periarfissarpassuit Danmarkimut, Kalaallit Nunaannut Savalimmiunut ilami issittumi najugalinnut tamanut soqutiginaateqarsinnaalluartut maanna ammaanneqarput. Aammali aarlerinaateqarsinnaasut ammaanneqarput, tassami nunat tamalaarpassuit aamma ammaanneqartussaammata nukittulluta akuusariaqaratta. Tassa issittoq sammineqaleraangat, Danmark naalagaaffeqatigiivilu nukittulluartumik inissisimasariaqarput.

Naalakkersuisullumi siulittaasuata qallunaat issittumut samminerulerniarnerat nuannaarutigaa.

Klavs A. Holmillumi issittoq pillugu suliniutissat piviusunngortinnissaannik suliassai imaannaanngitsuussasut, Villy Søvndal oqarpoq:

- Isumaqatigiissusiortoqartillugu Danmarkip inissisimallualernissaa neriuutigaarput, issittumilu umiarsuarnik angallannermi isumannaallisaanermut tunngassutilinnut angusaqarluarsinnaasoraara. Aamma aatsitassarsiornermut uuliasiornermullu tunngasunik Kalaallit Nunaanni ineriartortoqartillugu Danmarkip akuulluarsinnaanissaa Klavs A. Holmip atorfinitsinneqarneratigut anguneqarnissaa neriuutigaara. Ilami suliffeqarfissuatta akuutinneqarnissaat tamatta soqutigisarilluinnaratsigu. Nunanut allanut tunngasunut ministeri Villy Søvndal taama oqarpoq.

Klavs Holm ukiut 30-t sinnerlugit nunani allani Danmarki sinnerlugu aallartitatut sulisareerpoq, ilaatigut Singaporemi Danmarkip aallartitaatut, Londonimi ambassaderådetut, EU-milu ambassaderåditut atorfeqartarsimalluni. Aamma nunat tamalaat niueqatigiinnermut kattuffissuani WTO-mi Kalaallit Nunaat akuliunniarneqalermat Klavs A. Holm suleqataasimavoq. Massakkorpiarlu EU-p puisit amiinik eqqusseqqusiunnaarnera eqqarsaataaniittuarpoq:

- Nungusaataanngitsumik nunanut allanut tunisassiorneq aallaavigalugu Kalaallit Nunaata tunisassiulersinnaanissaa misigerusukkaluaqaara. Klavs A. Holm  naggasiivoq.

Ateq Klavs A. Holm ilisarissagaluarukku kukkuallaassanngilatit, tassami ilaarutilliilluni titartakkat Muuamaakkunnit kamaatigineqaleruttormata, Danmarkip nunanut allanut tunngasunut ministeriaqarfia sinnerlugu isumaqatigiinniaqataasimammat.