Aajuku sulorarnermi nunanut allanut unammisartut

Nuna tamakkerlugu sungiusaasoq Bjarne Nielsen aalajangersimavoq inuusuttut salliutillugit Island Gamesimut peqataasussanik toqqaaniarluni. Unammersuarnerit Isle of Wightimi ammarneqassapput juunip 25-at.

Misilittagartuut Mininnguaq Kleist B-67-meersoq aamma Juliane Brønlund JBF-meersoq piukkussat akornanniissimagaluarput GM-qarnerani ujaminnakkamik. Taamaattoq toqqarneqartut inuusukaajunerupput.

- Inuusuttut salliutinniarlugit aalajangersimavunga Island Gamesini tulliuttuni sakkortuunik unammisartoqalerniassagatta ujaminnanniunnerni akuusinnaasunik, nuna tamakkerlugu sungiusaasoq Bjarne Nielsen KNRimut taama oqarpoq.

Ajoraluartumik toqqarsinnaasimanngilaa arnani nunatsinni sulorallaqqinnerpaaq Mille Kongstad ajoqusersimanini pissutigalugu GMimut peqataanngitsoq aammalu Island Gamesimut piareersinnaanavianngitsoq. Sulorallammak taanna Qaqortumeersoq maanna Danmarkimi najugaqartoq kingullermik ukiut marluk matuma siorna Island Gameseqarmat finalemut anngukkaluarpoq Savalimmiuneersorli Sigrun Schmidt ajorsarfigalugu.

- Taamatulli pisoqarneratigut inuusuttut periarfissinneqarput aamma assorsuaq nuannerpoq takullugu ukiormanna pissartanngorniunnerni ujaminnanniunnissamut anngunniarlutik qanoq tamaviaartigisut. Piareersarnerput aallartereerparput siullermillu sungiusaqatigiinnerput pivoq sapaat apriilip 24-at, Bjarne Nielsen oqaluttuarpoq.

Aajuku toqqarneqartut:
Arnat:
Anja Skov Kjeldsen, B-67
Hedvig Broberg, SPQ
Ivalo Olsen, B-67
Sara Lindskov Jacobsen, B-67
Susanne Wahlbom, B-67
Paarlatsissamaat: Juliane Brøndlund, JBF

Angutit:
Bror Madsen, JBF
Frederik Elsner, B-67
Jens Frederik Nielsen, B-67
Mads Nyvold, B-67
Taatsi Pedersen, B-67
Paarlatsissamaat: Mininnguaq Kleist, B-67