Aajuku avannaamiut siuaasaat

Schweitz-imiup ujarassiuup, Arnold Heimip, assilisai, qalipaatillu atorlugit nammineq qalipaasersugai, ukiunik 100-t sinnerlugit pisoqaassusillit, Qeqertarsuup Tunuani Uummannallu sulluani assilisat, Ilulissani unnuk Kulturisiorfimmut atatillugu arfininngorpat saqqummersinneqassapput.
Allattoq Apollo Jeremiassen
januaarip 23-at 2013 06:46

Saqqummersitsineq, Uummannaq Polar Institutimi sulisumit, Erik Tornimit, aaqqissuunneqarpoq.

Assitoqqat 1909-meersut, taamani sumiiffinni arlalinni assilisat, asserluinnaannik sumiiffiit assileqqinneqarneri ilanngullugit saqqummersitsinermi takuneqarsinnaassapput.

Arfinninngorpat saqqummersitsinerup ammarneqarnerani, Uummannami meeqqat ulloq unnuarlu angerlarsimaffianneersut meeqqat arlallit, tassanilu sulisoq, Ron Alvarez, peqatigiillutik nipilersussapput.

Arnold Heimip assilisai Katuami saqqummersinneqareerput, aamma Zürichimi 'Focus Terra'-mi Interlakenimilu Schweiz-imiittumi, saqqummersinneqareerlutik.

Assitoqqat Københavnimi Kalaallit Illuutaanni Løvstrædemiittumi, februaarip naalernerani saqqummersinneqassapput, tamatumalu kingorna Tysklandimi illoqarfimmi Bernimi, Galerie Cernymi, saqqummersinneqassallutik.

Tassani saqqummersinneqareerpata, Parisimi aamma Bruxellesimi saqqummersinneqartussaapput, tamanna aningaasaliiffigineqassalluni Dronning Margrethep Prins Henriullu aningaasaateqarfianit. Saqqummersitsineq franskisut oqaatsit atorlugit nassuiaateqassaaq.

Arnold Heimip assilisaasa atuagartaa assitalersorluagaq, Nuummi pisiniarfimmi Anori Artimi, aamma Københavnimi Illu Atlantikumi, pisiarineqarsinnaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq