Aajap Folketingimi sulinini salliutinniaraa

Aaja Chemnitz Larsen Inatsisartunit sulinngiffeqarunnaarpoq, taamaalillunilu Folketingi Inatsisartullu ataatsikkut ilaasortaaffigilerlugit.
 
Taamaalilluni atorfiit marluk piffissaq tamakkerlugu atorfittut isigineqartut ataatsikkut isumagisussanngorpai. Aaja Chemnitz Larsenili naapertorlugu Folketingimi sulineranik sanngiillisitsinavianngilaq.
 
- Folketingimi sulingaatsiarnera pingaartippara, taamatullu sulinera ingerlatiinnassavara, Aaja Chemnitz Larsen oqarpoq.
 
Aamma Inatsisartuni sulinerminik sanngiillisitsissannginnerarpaa.

- Naagga, naamerluinnaq.

AAMMA ATUARUK Aaja Chemnitz marlunnik ilaasortaaffeqarnermini millionit sinnerlugit isertitaqalissaaq

Oqallinnerit nunatsinnut tunngassuteqartut salliutinniarai

Ullorli akunnernik 24-iinnarnik sivisussuseqarpoq, taamaammat aamma pingaarnersiuisoqartariaqassaaq.
 
- Pingaarporli oqaatigissallugu Folketingimi ilaasortat nunatsinneersut marluummata, taamaammat aamma uannut pingaaruteqarpoq oqallinnerit nunatsinnut tunngassuteqartut salliutinnissaat, Aaja Chemnitz Larsen taama oqarpoq.
 
Aaja Chemnitz Larsen aamma isumaqarpoq nunat inatsisartui marluusut ataatsikkut ilaasortaaffiginissaat iluaqutissartaqarsinnaasoq:
 
- Folketingimi Inatsisartunilu suliassat ilaat sunniuteqatigiiffiusassapput suliassallu assigiinngitsut qaleriittarsinnaallutik.
 
Aaja Chemnitz Larsen ukiumut 1.1 million koruuninik akissarsiaqarluni nunatsinni politikerit akissarsiaqqortunerit ilagilissavaat.

AAMMA ATUARUK Aajap Ane Hansen taarseraa