Aaja Chemnitzip ministeriuninngorniuttuni kina tapersissanerlugu qinersitinnata oqaatigerusunngikkaa
![](/sites/default/files/styles/image_934x467/public/article_images/aaja_0.jpeg?itok=p5-ljawU)
IA-meersoq Aaja Chemnitz Folketingimi ammaanersiorluni sisamanngornermi oqallinnermi oqalugiarami, danskit naalakkersuisui socialdemokratiusut nersualaaqattaarpai.
Taanna ilaatigut ima oqarpoq: " Suleqatigiinnitsinnut sulianullu naammassisanut qujavugut. Kalaallit isaanniit isigalusi sullerippusi". Oqalugiaramilu ataasiaannarani nersualaarinnippoq.
AAMMA ATUARUK Nunatsinni partiit Folketingimut qineqqusaarnermi pingaartitaat makkuupput
Siumumeersoq Aki-Matilda Heøgh-Dam ministerinngorniuttuni kina tapersissanerlugu aperineqarami erseqqissumik akinngilaq. Aaja Chemnitz KNR-imit asserpiaanik sapaatit akunneranni uani aamma aperineqarami erseqqissumik aamma akinngilaq.
- Kalaallimik ministeriuninngortoqarnissaata kissaatiginaraluaqinera miserratiginngilara. Ajornarmalli nunatta soqutigisaanut tunngasunik naammassisaqarluarsinnaasorisara tapersersussavara, taanna KNR-imut oqarpoq.
Kikkunnik tapersersuinissamik neriorsuuteqanngitsoq
Aaja Chemnitz IA-lu Folketingimut kingullermik 2019-imi qineqqusaaramik “Kalaallit Nunaata nipaa killilersugaanngitsoq” qulequtaraat.
Folketingimi kikkunnik tapersiinissamik neriorsuuteqareersimannginnini IA-p nunattalu Danmarkimi politikkikkut sunniuteqarluarnissaannut iluaqutaasimasoq, Aaja Chemnitz isumaqarpoq.
- Nunatta nipaata killersugaannginnissaanik pingaartitsinerput siammasissumik suleqateqarnitsinnut tunngaviuvoq. Talerperliunianeersunik suleqateqarsinnaanermik misilittagaqarnera nunatsinnut iluaqutaavoq. Kingoraakkanninngarnimmi siammasinneroqisumik suleqateqarpunga, Aaja Chemnitz oqarpoq.
IA saamerliunianut ilaasoq
IA-li Danmarkimi saamerliuniat akornanniittuaannarsimasoq, taassuma nassuerutigaa.
Tamannali taassuma IA-llu Mette Frederiksenip ministeriuninngoqqinnissaanut ilumut tapersiissanerannik qulakkeerisuunngilaq.
AAMMA ATUARUK Stadig en hemmelighed: IA vil ikke afsløre deres folketingskandidater
Ingammik qinigassanngortittuni Atlantikup avannarpasissuaneersut Danmarkimi naalakkersuisunngortitsiniarnermi aalajangiisuussagunik. Naalakkersuisunngorniuttummi naligiikanneqisut, inunnik isumasiuinerit takutippaat.
- Qinersinermi aalajangiisuussagutta, nunatsinni qinersisartut sinnerlugit ministeriuninngortussap kiunissaanut sapinngisamik sunniuteqarluarniassaagut, Aaja Chemnitz oqarpoq.
Konservative Folkepartilli siulittaasuata, Søren Pape Poulsenip, nunarput nunanut siuarsarniakkanut assersuuppaa. Suleqatigisinnaanissaalu taamaalioreernerani takorloruminaatsilersimagini, Aaja Chemnitz sapaatit akunnerata naanerani oqarpoq.
Naleqqap qinigassanngortitaasa ministeriuninngortussani kina tapersissanerlugu aamma oqaatigereerusunngilaat. Kikkut nunatta namminersulivinnissaanut tapersiissanersut apeqqutaasoq, Naleqqameersoq Kiista Fencker oqarpoq.
Demokraatineersup, Anna Wangenheimip, ministeriuninngortussani kina tapersissanerlugu aamma oqaatigereerusunngilaa.
Atassutip ministeriuninngorniuttuni talerperliuniamik tapersiiniarlutik Siumukkormiullu Mette Frederiksen ministeriuninngoqqinnissaanut taperserniarlugu nalunaareerput.