Aaja Chemnitz: Qinersisartut atugarissaarnerunissaq namminiilivinnissamit pingaartinneruaat

- Kalaallit Nunaata namminiilivinnissaa qineqqusaarutigineqarnerusoq Danmarkimi tusagassiorfiit tusagassiinerminni saqqummiuttaraat amerlasuut maluginiarsimassavaat.

- Taanna eqqortumik takutitsisuunngilaq, Aaja Chemnitz Larsen oqarpoq.

Partiit siuttui Folketingimi ullumi marlunngornermi oqallitsinneqarput, Inuit Ataqatigiillu sinnerlugit Folketingimut ilaasortap Aaja Chemnitz Larsenip oqallinneq aallarnerpaa.

Taassuma Inatsisartunut qineqqusaarnermi naammasseqqammertumi maluginiarsimasani pillugit tassani oqaaseqarpoq.

Atugarissaarnerunissaq, meeqqat sumiginnakkat, innarluutillit atugaat ilinniartitaanerlu

Kuannersuarni aatsitassarsiulersaarneq, innuttaasut atugarissaarnerunissaat, meeqqat sumiginnakkat, innarluutillit atugaat ilinniartitaanerlu namminiivilinnissamit qineqqusaarutigineqarnerusimasut, Aaja Chemnitz Larsen isumaqarpoq.

- Qinersisartut qineqqusaartunut apeqqutaat ulluinnarni atukkanut samminerusarput. Naligiinnginneq. Kinguaassiuutitigut atornerluinerit, persuttaasarnerit imminullu toquttarnerit qanoq pinaveersaartinneqarsinnaanersut.

- Suliffissaqartitsiniarneq. Tassa tamakku qinersisartut qineqqusaarnerni apeqqutigikkajunneruaat qinersinerlu taakkununnga samminerulluni, Aaja Chemnitz Larsen oqarpoq.

AAMMA ATUARUK Siumut Inuit Ataqatigiinnut isumaqatigiinniarnernit peqataajunnaartoq

- Tassa pingaarnertut suliassavut. Qinersisartut taakku pinerullugit soorlu aqagu namminiilivinnissamut neriorsuutit pinnagit qinersipput, Aaja Chemnitz Larsen oqarpoq.

Ministeriunerlu, Mette Frederiksen, Folketingip ataatsimiittarfiani oqaaseqarami, Inuit Ataqatigiit qinersinermi ajugaanerat pilluaqqussutigaa:

- Qinersinermi angusaannut pilluaqqusivunga, Kalaallit Nunaannilu maanna isumaqatigiinniarnerit ingerlalluarnissaannik kissaappakka. Tatigeqatigeqatigiillutalu suleqatigiilluaannarnissarput aamma kissaatigaara.

Ministeriunerup oqarneratuut, nunatsinni isumaqatigiinniarnerit pileruttorput. 

Inuit Ataqatigiit siulittaasuat, Múte Bourup Egede, naalakkersuisunngortitsinissamut isumaqatigiinniartitsisuuvoq.

Tassami Inuit Ataqatigiit Inatsisartuni issiavinni 31-iusuni aqqaneq marluk ingiffigisussaagamikkit, Naalakkersuisunngortitsiniarunik taasisinnaasunik sisamanik pisariaqartitsipput.

Partiit marluk assigiinngippallaarnerat pissutigalugu isumaqatigiinniarnerni peqataajunnaarlutik, Demokraatit tallimanngormat nalunaarput. Siumukkormiullu ullumi aamma taamaaliorput.

Tassa imaappoq, Inuit Ataqatigiit Atassut Nalerarlu isumaqatiginninniaqatigisinnaasatuarilerpaat.