Aaja Chemnitz Larsen Folkemødetip oqaloqatiginnilluarnnaanermut nersorinninniutaanut toqqarneqartoq: Una Kalaallit Nunaannut nersuineruvoq
![Aaja Aaja](/sites/default/files/styles/image_934x467/public/article_images/aaja_1.jpeg?itok=MwCb01jg)
Inuit Ataqatigiinnit Folketingimut ilaasortaq Aaja Chemnitz Larsen Folkemødetip oqaloqatigiilluarsinnaanermut 2021-mi nersorniutaanut toqqagaavoq.
Nunatsinnit politikerini siullersaalluni nersorinninniummut innersuunneqarpoq, siullersaallunilu toqqagaalluni.
AAMMA ATUARUK Aaja Chemnitz Larsenip illersornissamut isumaqatigiissut isorineqartoq tapersersoraa
Aaja Chemnitz Larsenilu Bornholmimi Allingemi toqqagaasimanini ualeq manna paasigamiuk malunnartumik killitsissimavoq.
- Una nersorniut nunatsinnut nersorniutaavoq, ilissilu tamassi sinnerlusi tigunissaa tulluusimaarutigisorujussuuara. Nunatta ersernerutilernera ilisimasallu siaruaannissaat tamatta iluatsipparput, Aaja Chemnitz Larsen tusagassiuutinut nalunaarummi oqarpoq.
Folkemødet
Folkemødet Bornholmimi illoqarfimmi Allingemi ukiut tamaasa sapaatit akunneranni 24-mi ingerlanneqartarpoq.
Innuttaasut aalajangiisartullu qaninnerulersitsinikkut tatigeqatigiittoqarnerulersitsinikkullu Danmarkimi tamat oqartussaanerata pitsanngorsarnissaa Folkemødeteqartitsinerup siunertaraa.
Innuttaasut, politikerit, soqutigisaqatigiiffiit inuussutissarsiornermillu ingerlatallit naapinnissaat siunertaavoq.
Tusarfik: Folkemoedet.dk
Nunarput oqaluuserisassanngortittaraa
Ilaatigut nunatta Danmarkillu akornanni naammassisaqarniarnermik tatigeqatigiinnermillu tunngaveqartumik oqaloqatigiinnermik sulissuteqartoq, Inuit Ataqatigiinnit politikerip nersorinninniummut innersuunneqarnera tunngavilersorneqarpoq.
Nunatsinnilu inuuniarnikkut ajornartorsiutit naalagaaffeqatigiinnit tamanit suliarineqalersitsisimasoq aamma tunngavilersuutigineqarpoq.
- Aamma suliat paqumigineqartut suliaqartarniga pingaaruteqarsoraara, tassami nammineq suaaruteqarsinnaanngitsut sinnerlugit oqaluttarnissannik anguniagaqarama, Folketingimut maannamut ukiuni arfinilinni ilaasortaasoq Aaja Chemnitz Larsen oqarpoq.
Oqaloqatiginnilluarsinnaasoq
Oqaloqatiginnilluarsinnaanermut nersorinninniut politikerimut immikkut ittumik tusarnaarsimasumut, oqaloqateqartarsimasumut oqallinnerniillu sunnerneqarsimasumut Folkemødeteqarnerani ukiut tamaasa tunniunneqartarpoq.
AAMMA ATUARUK Aki-Matilda Høegh-Dam Danmarkip qimaasunik tigusinissatsinnut kimigiiserfigissanngilaatigut
Tassani politikeri oqaloqatiginnilluarsinnaasoq nersornaaserneqartarpoq.
Aaja Chemnitz Larsenip saniatigut Venstremeersoq ilinniartitaaanermut ilisimatusarnermullu ministeriusimasoq Tommy Ahlers, Det konservative Folkepartiimit Folketingimut ilaasortaq Mona Juul, Radikale Venstremit Folketingimut ilaasortaq Stinus Lindgreen taavalu Faaborg-Midtfyn Kommunemi borgmesteri Socialdemokraatineersoq Hans Stavnsager nersorinninniummut innersuunneqarput.