600 angerlarsimaffeqanngillat
Kalaallit Nunatsinni angerlarsimaffeqanngitsut pillugit nalunaarusiami nutaami erserpoq, inuit 600-t missaat angerlarsimaffeqanngitsutut 2010-miilli nalunaarsorsimasut. 250-it missaat allamik inissarsineqarsimapput - tassa imaappoq, angerlarsimaffimminniit anisitaariarlutik allamut nuutsinneqarallarsimallutik. Erseqqissaatigineqarporli, inissaqanngitsut angerlarsimaffeqanngitsullu qanorpiaq amerlassuseqarnersut oqaatigineqarsinnaanngitsoq.
Nalunaarut nutaaq, Danmarkimi naalagaaffiup Illuliornermut ilisimatusarnermut suliffeqarfeqarfimmit institutimit, Aalborg Universitetimiittumit, Namminersorlutik Oqartussat suleqatigalugit suliarineqarpoq. Taanna tusagassiortunik katersortitsinermi ullumi saqqummiunneqassaaq, Ilaqutariinnermut Inatsisinillu Atuutsitsinermut Naalakkersuisoq, Martha Lund Olsen, saqqummiussisuussalluni.
Angerlarsimaffeqanngitsut tamarmik inissisimanerisa ilisimasaqarfiginissaat qanoq pingaaruteqartigisoq Martha Lund Olsenip ullumi tikkuarpaa.
- Nalunaarutip takutippaa, inunnik isumaginninnermut- ineqarnermullu tunngasut politikkikkut ataqatigiissumik sulissutigineqartut. Angerlarsimaffeqanngikkaanni imaanngilaq inissaqanngikkaanni taamaattuulluni, aammali inuttut ajornartorsiorneq peqqutaasarpoq. Soorlu suliffissaqannginneq pissutaasinnaavoq, Martha Lund Olsen tusagassiuutinut allakkamini allappoq. Isumaqarporlu nalunaarusiap nutaap angerlarsimaffeqanngitsut inuunermut nuannersumut uteqqissinnaanissaannut politikkikkut neqeroorfigalugit aqqutissiuussinnaassagai.
Sisisuumik ilisimatusarsimasup, Knud Erik Hansenip, ilisimatusarnermullu pisortap, Hans Thor Andersenip, nalunaarusiaq suliaraat. Taakku marluk Aalborg Universitetimiipput.
