50-inik ukioqartoq kapineqarluni toqunneqarsimassangatikkaat
Angut 50-inik ukioqartoq Tasiilami ippassaq toquvoq. Savimmik kapineqarluni toqunneqarsimassangatinneqarpoq.
Allattoq Simon Uldum -
Tasiilami Politiinut pingasunngormat ullaassakkut nalunaaqutaq 02.10 nalunaarutigineqarpoq, angut 50-inik ukioqartoq Kulusummi illumini toqungasoq nassaarineqarsimasoq.
Politiit peqqinnissaqarfimmeersullu Kulusummut ornigummata angutip toqusimanera uppernarsarneqarpoq.
Tamatumunnga atatillugu angut 45-nik ukioqartoq toqutsisimasutut politiinit tigusarineqarlunilu unnerluutigineqarpoq.
- Suliami paasissutissat tunngavigalugit angut 45-nik ukioqartoq angummik 50-inik ukioqartumik savimmik kapillugu toqutsisimasutut pasivarput, unnerluussisussaatitaasut pisortaat Lars Kirkegaard taama oqarpoq.
Taassumattaaq oqaatigaa, angutip 45-nik ukioqartoq inatsit tunngaviusoq naapertorlugu killisiorneqassasoq, sapaatit-akunnerinilu sisamani tigummigallagassanngortinneqarnissaa unnerluussisussaatitaasut piumasaqaatiginiaraat.