Republikanerini 50-usuni 45-t Trump eqqartuunneqartariaqanngissorigaat
Donald Trumpip naalakkersuinermut akisussaasumut senatimi eqqartuussinermi pisuutinneqarsinnaanissaa USA-mi demokratit ilimagivallaassagunanngilaat. Eqqartuussineq februaarip ulluisa arfineq-pingajuanni aallartissaaq.
Naalakkersuinermimi akisussaasumut eqqartuussisoqarnissaanut siunnersuut senatimi marlunngornermi taasissutigineqarnerata inernera taama tikkuussisuusinnaavoq.
Republikanerit 50-it akornanni 45-t isumaqarput eqqartuussisoqartariaqanngitsoq. Taakkumi isumaqarput, Trump præsidentiujunnaareermat eqqartuussinissamut siunnersuut nunap tunngaviusumik inatsisaanut naapertuutinngitsoq.
Trumpilli naalakkersuinermut akisussaasumut eqqartuunneqarnissaanut siunnersuut senatimi amerlanerussuteqartut tapersersorpaat, ilaasortat 100-t akornannni 55-it tapersersuillutik.
AAMMA ATUARUK Donald Trump naalakkersuinermut akisussaasumut aappassaanik eqqartuunneqalertoq
Trumpip eqqartuunneqarsinnaannginnissaa pillugu siunnersuut republikanerit sinnerlugit ilaasortap Rand Paulip saqqummiussimagaluarpaa, amerlanerussuteqartunilli tassa itigartitsissutigineqarluni.
Trump pisuutinneqassaguni senatorit 67-it amerlanerusulluunniit tapersersuisariaqassapput.
Tassa imaappoq, republikanerit 50-iusut akornanni 17-it demokratit assigalugit siunnersuummut tapersersuisariaqassapput.
Trumpilli pisuutinneqarnissaanut amerlanerussusiisoqarsinnaanngitsoq marlunngornermi unnukkut taasititsinerup inernerata takutippaa. Aviisi The New York Times taama allappoq.
Trumpili amerlanerussuteqartunit pisuutinneqassaguni naalagaaffeqatigiinnermi atorfimmut sumulluunniit qinigassanngorteqqissinnaajunnaartitaasinnaavoq.