3900 Pictures akiliisinnaajunnaarpoq
Filmiliortitseqatigiit qaammatit marluk matuma siorna akiliisinnaajunnaarput ullumikkullu 2,5 millioner koruuninik akiitsoqarlutik.
- Tassaana aningaasaataarutiveqqasugut. Allaanngilarmi umiarsuaq kivilersumi ilaaginnakasillartunga. Ilami nunamut talilersugullu umiarsuup immalluni kivilerneratut misinnarpoq, taamaattoqarsimaneralu assut ugguarnarpoq, akiliissinnaajunnaarnerpullu uannut annernarluni, Otto Rosing oqarpoq.
Filmiliortitseqatigiit qaammatit marluk matuma siorna akiliisinnaajunnaarput, ullumilu 2,5 millionit koruuninik akiitsoqarlutik. 3900 Pictures akiliisinnaajunnaarmat filmimut Nuummiumut piginnittussaaneq Otto Rosingip tiguaa, filmimillu nunarsuarmut siaruaassisinnaasumik sullissisussamik nassaarnissani suli neriuutiginerarlugu.
- Una filmiliaq filmiliatsialaavoq, tassaallunilu sulilluarnerup, tunniusimalluarnerullu kingunerisaa. Maannali niuertutut eqqarsartariaqalerpugut, tamannalu ilungersunassaqaaq. Filmili maanna tigummivara tulluusimaarutigalugu. Aamma filmilinik naliliisartunit nuannarineqarnera nalunngilara, kisiannili ilungersortariaqarnissara qularinngilara, Otto Rosing oqarpoq.
- Maanna nutaamik filmiliornissara sulissutigileruttorpara. Filmip taassuma Palasip arnaq inuusuttoq ajornartorsiortumik ikiuineranik imaqassaaq, Otto Rosing oqarpoq.
Filmi nutaami Maariu Olsen pingaarnertut inuttaassaaq, taannalu Nuummiumi aamma peqataavoq. Filmi pilersaarutit malillugit Københavnimi nunatsinnilu illoqarfiit ilaani immiunneqassaaq, filmilu ukiup ataaseq qaangiuppat immiunneqarluni aallartinneqarnissaa Otto Rosingip neriuutiginerarpaa.
Otto Rosingip 3900 Pictures-imi suleqatigisimasaa Mikisoq Lynge aningaasanik peqquserluuteqarsimasutut politiinut tunniussisimaneranik suliaq suli ingerlavoq. Pisuutitsiniutilli taamaattut Mikisoq Lyngep KNR-imut ilumuunnginnerareerpai.
