34-ssaanik Tivolimi Kalaallit Nunaata ullui aallartipput

Tivoli Københavnimiittoq ullumimiit 34-ssaanik Kalaallit Nunaannut tunngasunik ulloqartitsilerpoq. Nipilersornerit, qittannerit allarpassuillu takorniuunnernik ilallit ulluni pingasuni pissapput.
Allattoq Najaaraq Egede
juulip 30-at 2009 05:52

Tivolimi inoqannginnersaq niuffaffiussaaq: Sanalukkanik, kusanartulianik, nerisassianik - assersuutigalugu umimmaap neqaanik kebabiliat misilinneqarsinnaassallutik, juulimaaq naapinneqarsinnaassalluni kaffillertoqassallunilu.

Tivolip tasiani ullumimiit arfininngorneq ilanngullugu aamma qajartornernik takutitsisoqassaaq.

Nipilersortussat ilagaat Miniput Band Qasigiannguaneersut, Nanoq Band, rappertartut The Dynamouz, Liima Inui, Ulf Fleischer aamma Rasmus Lyberth.

Tivoli i Grønland-imik taallugu aaqqissuussaq Kalaallit Nunaannut tunngassutillit nunatta avataani pisartut annersaraat, 1976-imi aallartittoq. Inuillu tusindilikkaat ulluni tullerni peqataassangatinneqarput. Ukiut tamaasa pulaartut amerliartuinnavissimapput, siorna ulluni pingasuni 100.000-it tungaanut amerlassuteqarsimallutik.

Peqatigiiffiup aaqqissuisuusup kalaallit kulturiata tunisassiaasalu nunatta avataanit ilisimaneqarnerulernissaat siunertaraa.

Ualeru misigisassat ilagissavaat qitinnermik takutitsineq Tulugaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq