32-nik ukiulik Oslomi biilinik aporaalluni toqutseriaraluartutut unnerluutigineqartoq

Norgemi politiit angut 32-nik ukiulik ambulancemik qimarngussisimanerarpaat. Taanna minutsit 15-it qaangiunnerani pissanganartorsiorfiusumik tigusarineqarpoq.
Norgemi politiit angut 32-nik ukiulik ambulancemik qimarngussisimanerarpaat. Taanna minutsit 15-it qaangiunnerani pissanganartorsiorfiusumik tigusarineqarpoq. Assi © : Scanpix
Allattoq Ritzau
oktobarip 22-at 2019 15:37
Nutserisoq Connie Fontain

Inuit qassiiusut – anaana marlulissallu qamutaaqqaniittut ambulancenit Oslomi tillinneqartunit marlunngornermi aporneqarput.

Angut 32-nik ukiulik ambulancenik qimarngussisoq sakkulisarsimasoq Norgemi politiit oqaatigaat. Taanna minutsit 15-it qaangiuttut pissanganartorsiorfiusumik tigusarineqarpoq.

Politiit ualinerusoq anrnamik 20-t sinnerlugit ukiulimmik aamma tigusarinnipput.

Angutip 32-nik ukiullip inuit pissutissaqanngitsumik aporarniarlugit ambulance tillissimagaa, politiit oqaatigaat.

- angut sianissuseqarluni biilimik ingerlatsilluni inunnik taamungaannaq aporaalluni pinerluuteqarsinnaanera Ilungersunarluinnarlunilu ajuusaarnarpoq, politimesteri, Johan Frederiksen tusagassiortunik katersortitsinermi oqarpoq.

Timmiarsiut illuinnarsiullu eqqarasuartaat ambulancemiittut

Politiit ambulancemi aallaasinik marlunnik nassaarput: Timmiarsiut illuinnarsiullu eqqarasuartaat Uzi nassaarineqarput, saniatigullu ikiaroornartorpaalunnik aamma nassaartoqarluni.

Aporaasoqaqqammitsiartoq arnaq marlulissallu napparsimmaviliaanneqarput. Marlulissallu annikitsuinnarmik ajoquserneqarsimasut matuma paasineqarpoq.

AAMMA ATUARUK Oslomi politiit ambulancenik aporaasoqareernerani angummik suli ujaasisut

Politiit ambulancemut pingasoriarlutik ”ilungersunartumik” ambulancemut eqqaallutik unitsitsiniaapput,

- Ajorluinnartumik pissusilersuuteqartoqarneranik piaartumik unitsitsiniarpugut, Johan Frederiksen oqarpoq.

Naggataatigullu, ambulance illuanit illuaniillu aporlugu iluatsittumik unitsinneqarpoq.

Politiinit ilisimaneqareersoq

32-nik ukiulik toqutseriaraluartutut unnerluutigineqarpoq. Taannalu politiinit siornatigulli ilisimaneqareerpoq, politiilli angutip iliuuserisaanut pissutaasumik aalajangersumik oqaaseqanngillat.

Aporaanermi iliuuserineqartumi peqqarniisaarniartoqarneranut pasitsaassisoqanngitsoq politiit Twitterimut siusinnerusukkut allapput.

Politiinut nalunaaruteqartoqaqqaarmat Oslomi Rosenhoffimi angallannermi ajutoortoqarsimasoq biililu illup qaanut tussimasoq nalunaarutigineqarpoq. Kinguninnguanilu angut sumiiffimmit qimaasoq politiinut nalunaarutigineqarpoq. Angut sakkoqarnerarneqarpoq inunnullu aallaasimik umiisoqarsimasoq, aviisi VG allappoq.

Piffissami tassani angut ambulancenut uninngasunut ikeriarluni sukkaannaq aallarsimavoq.

Arnat tigusarineqartoq ”angummut tigusarineqartumut atassuteqartoq” politiit siusinnerusukkut ilisimatitsissutigaat.