Coronavirusimik Danmarkimi toqquteqartut 32-nngortut

Coronavirusimik Danmarkimi toqquteqartut taamaalillutik arfineq-pingasunik amerlipput. Taakkua ataasinngornermi 24-upput.

Coronavirusimillu Danmarkimi tunillanneqarsimasuni uninngasut 301-inut aamma amerleriarsimapput. Uninngasullu taamaalillutik 47-inik nalunaaquttap akunneri 24-t ingerlaneranni amerlillutik.

Taakkunannga 69-it peruluttut inaanni uninngasut, Peqqissutsimut Aqutsisoqarfiup ilisimatitsissutigaa.

Peruluttut inaanni uninngasuni 58-it anersaartuuteqartariaqarput.

Uninngasut marlunngornermi amerleriarnerisa kingorna uninngasut aatsaat taama amerlatigilerput.

Uninngasut taamaalillutik ulluni kingullermi 30-nit ikinnerunngitsunik amerleriarput.

AAMMA ATUARUK Danmarkimi coronavirusimik toqquteqartut maanna 24-usut

Uninngasut ataasinngornermi 254-iupput. Taakkunannga 55-it peruluttut inaanniillutik.

Danmarkimi peqqissutsimut oqartussat uninngasut upernaap ingerlanerani amerleriapiloornissaat ilimagigitsik sapaatit akunnerini kingullerni nalunaarutigisaqattaarpaat.

Coronavirusimik tunillanneqarsimasuni uninngasut amerlinerat napparsimmaviit tamaviaalernerannik kinguneqassangatinneqarpoq, taamaammallu piginnaassuseqarnerulernissaat sulissutigineqarluni.

Ilaatigullu suliaritinnissat pinartuunngitsut kinguartinneqarput, napparsimmavinnilu sulisut coronavirusimik tunillanneqarsimasunik isumaginninnermik ilinniartinneqarlutik.